أبو بكر شوقي: أحداث فيلم «القصص» مستوحاة من قصة تعارف والديّ

قال المخرج والمؤلف أبو بكر شوقي إن فكرة فيلمه «القصص»، بدأت عام 2019، موضحا أنه كان يرغب في تقديم فيلم عن قصة تعارف والده ووالدته، حيث إن والدته من النمسا ووالده من مصر، وكانا يتبادلان الرسائل في سبعينيات القرن الماضي.

والدتي من النمسا ووالدي من مصر

وأضاف شوقي خلال لقاء ببرنامج “معكم” الذي تقدمه الإعلامية منى الشاذلي، على قناة «on»: «جزء صغير كان من عيلتي، الموضوع كله بدأ في 2019، أنا كنت عاوز أعمل فيلم عن والدي ووالدته اتقابلوا إزاي، والدتي من النمسا ووالدي من مصر، وهم كانوا بيكتبوا جوابات لبعض في السبعينات، فكانت عاجباني جدا فكرة المراسلات وإن حاجة عبر البحار وبيستنوا شهر على بال ما الجواب ييجي ويرد عليه وكده، فكنت عاوز أعمل فيلم عن الموضوع ده».

وتابع: «الفيلم طبعا عبر السنين كبر وكبر وبقى فانتازيا أكتر وأكتر، جزء كبير منه هنلاقي إن فيه حقائق كانت موجودة، وحاجات مرتبطة بجدي وجدتي وأعمامي والقصص اللي كانوا بيحكوها، وكل الحاجات اللي كانت بتحصل وقتها في الفترة دي، لأنهم أسرة مصرية بسيطة عدت بمراحل صعبة».

أحداث الفيلم

وأشار إلى أن أحداث الفيلم تدور في فترة تاريخية شهدت العديد من التحديات، قائلا: «كانت مرحلة صعبة جدا في الستينات، كان فيه حروب وكان فيه مظاهرات وكان فيه حاجات كتير، وأنا كنت عاوز أعمل فيلم عن الفترة دي، إنما ابتدت بقصة الحب، كله بدأ بقصة الحب، كنت عاوز أعمل الفيلم عن قصة الحب دي، والله النية كانت خير».