«ساعتين ونصف تأخير».. والد طالبة أكاديمية الطيران يفتح النار بعد حادث الطائرة

تحدث أشرف حامد إبراهيم واصل والد منار أشرف الطالبة بأكاديمية الطيران التي أصيبت في حادث سقوط الطائرة التي توفى فيها كابتن الطائرة شريف جمال عن الحادث المأساوي الذي تعرضت له ابنته، معلقا: «الحادث حدث حصل الساعة 2 إلا 10 ونقلوا بنتي هنا مستشفى 6 أكتوبر العام، جابوها مستشفى أكتوبر العام الساعة 4 ونص يعني ساعتين ونص تأخير وبنتي كانت بين الحياة والموت». 

مدفوعلها 6 مليون جنيه

وأضاف، خلال فيديو على صفحته الشخصية على موقع التواصل الاجتماعي «فيسبوك»: «طلبنا من وزارة الطيران والصحة كل يوم يبعتولنا استشاري، والمستشفى كل اللي فيها امتياز، هما مقصروش وأعطوها أحسن رعاية، بس دي إمكانياتهم وهي كانت محتاجة إمكانيات أعلى من كده بكتير، دي طالبة مدفوعلها فلوس بالهبل، مدفوعلها 6 مليون عشان تتعلم وتبقى كابتن طيار، وفي الآخر تتنقل مستشفى 6 أكتوبر العام». 

قطط والدة داخل الرعاية

وتابع: «تعالوا شوفوا مستوى القطط اللي والدة جوه الرعاية، وفي الآخر ييجي يبص عليها دكتور ويقول يا جماعة اقرأولها قرآن وادعولها، ومش بيقدملها أي دعم طبي، كل اللي ييجي يقولها ادعولها، مفيش في إيدينا غير الدعاء، وفي الآخر ينزلوا على السوشيال ميديا كلها الوزير بيصرح إنها في حالة كويسة وبتتلقى أحسن رعاية وعلاج، مفيش الكلام دا، احنا لو عايزين قطنة بنروح نشتريها، طالبين مننا دم الساعة 3 الضهر نروح نجيبه من معامل الدقي، ازاي الكلام دا معندهومش دم». 

مفيش دم ولا قطن

واختتم: «مفيش دم ولا صفائح دموية في المستشفى، بيقولك أكياس الدم بتخلص هنجيبلك دم منين روح اتصرف، مفيش مشكلة الفلوس في داهية أعالجها زي مانا عايز بس ليه ساعتين ونص تأخير؟، ليه وصلوها للمرحلة دي».  

في سياق متصل، نعت وزارة الطيران المدني، برئاسة الدكتور سامح الحفني وزير الطيران المدني والطيار عزت متولي رئيس الأكاديمية المصرية لعلوم الطيران، الطالبة منار أشرف حامد إبراهيم، بالأكاديمية المصرية لعلوم الطيران، والتي وافتها المنية اليوم إثر الحادث الأليم الذي تعرضت له إحدى طائرات التدريب.
وأكدت الوزارة، في بيان نعي، أن جميع العاملين بقطاع الطيران المدني يتقدمون بخالص التعازي وصادق المواساة إلى أسرة الفقيدة، سائلين المولى عز وجل أن يتغمدها بواسع رحمته، وأن يسكنها فسيح جناته، وأن يلهم أهلها وذويها الصبر والسلوان.
وأعربت وزارة الطيران المدني عن بالغ الحزن والأسى لوفاة الطالبة، داعية الله أن يمنح أسرتها القوة والثبات لتجاوز هذا المصاب الأليم.