سامح صفوت يوجه رسالة غامضة: "الواحد متربي يصون العيش والملح"
حرص الفنان سامح صفوت، على توجيه رسالة لجمهوره عقب خروجه من المستشفى، عبر حسابه الرسمي على موقع التواصل الاجتماعي "فيسبوك".
ونشر سامح صفوت، صوره له، وكتب عليها قائلًا: "الحمد لله على الشدة اللي عرفت الواحد مين اللي ظهر وقت التعب ومين اختفى، المرض كان وجع بس نعمة من عند ربنا لازم نشكره عليها وإنه كشف عن الناس الأصيلة اللي دعواتها كانت بتوصل شايلكم في قلبي والله، ولولا الشدة اللي الواحد مر بيها مكنش هيعرف الفرق بين شخصيات في حياته".
وأضاف سامح صفوت، قائلًا: "مين الصاحب أو ابن الناس الأصيل الجدع اللي بجد أو حتى معرفتي حديثة العهد بيه أشكره من كل قلبي، ومين اللي كان بيني وبينه عيش وملح وعشرة سنين طويلة وماعملش بيها وكان صاحب مصلحة، مع إن الواحد متربي من والده ووالدته رحمهما الله والبيت اللي طالع منه إنه يصون العيش والملح ويراعي العشرة سواء في مجال الحياة الشخصية أو العملية".
سامح صفوت: ناس كنا فاكرينها قريبين اتبخرت
وتابع سامح صفوت، قائلًا: "ناس كنا فاكرينها قريبين اتبخرت وناس مكناش نتوقعها كانت أول الحاضرين بالسؤال والدعوة والكلمة الطيبة، درس والواحد أتعلمه ومش هيتنسي، الحمد لله عدت على خير وطالع منها متعلم حاجة جديدة على رأي المثل الإنسان طول ما هو عايش بيفضل يتعلم، واللي متابعيني وجمهوري اللي إنتوا بالنسبة لي أهلي وأخواتي وعيلتي الكبيرة بأشكركم من كل قلبي، وأشكر كل حد كتب لي كلمة ودعوة طيبة من قلبه".
وأكمل سامح صفوت، قائلًا: "كمية الدعوات اللي جاتلي وأنا تعبان على صفحاتي و صفحات الغير وعلى كل المواقع فوق الوصف وفيها كمية حب صادق من القلب وكل واحد سأل عني من الوسط الفني والإعلامي والقانوني اللي هو مجال عملي الأساسي بصفتي محام مستشار قانوني بالنقض".
وأردف سامح صفوت، قائلًا: "حسيت إني بتعافى بفضل ربنا وقدرته ثم دعواتكم اللي وصلت وحسيت بيها وكانت سند ودعم وحسيت إن الدنيا لسه بخير وفيها ناس صافية ونقية زيكم، ربنا ما يحرمني من محبتكم ويكتب لكم أجر كل دعوة ويحفظكم ويجازيكم كل خير وما يكتب على حد المرض والضيق والشدة، بس لو جت اعرف إنها هتنضف حياتك".
واختتم سامح صفوت، قائلًا: "حسبي الله ونعم الوكيل وفوضت أمري إليه في كل من أذاني في حياتي وكان السبب فيما جرى، ياترى حد فيكم مر بشدة في يوم من الأيام عرفته الناس على أصلها ؟!".
