لماذا طلبت أم كلثوم وقف أغانيها من الإذاعات المصرية؟.. سناء منصور تكشف مفاجأة
كشف الإعلامية القديرة سناء منصور، عن كواليس قصتها مع كوكب الشرق أم كلثوم، قائلة: «في بدايتي كنت صوتي رفيع جدا لكن مفيد فوزي وأمل فهمي اختاروني إني أقدم أكثر برنامج جرأة في الإذاعات المصرية في شهر رمضان وحطوني في وش المدفع في برنامج كان اسمه وافق أو امتنع».
وأضافت، خلال استضافتها في برنامج «نقطتين وخط» المذاع عبر يوتيوب: «كان مفيد فوزي بيكتب وأنا بقدم.. كل سؤال كنت بقوله كان بيلخص حالة وأنا مكنتش فاهمة ده.. وخلال الحلقات أكثر من مرة جبنا سيرة أم كلثوم وأنا كنت طربشة جدا وقتها».
وتابعت: «سألت الأستاذ يوسف إدريس هل يقدر إنه يمتنع عن التدخين في حفلات أم كلثوم لأنه ده كان قرار من محافظ القاهرة.. فهو رد وقال مش بحضرلها حفلات.. مرة تانية سألت الأستاذ أحمد بهاء الدين هل بعيد عنك حياتي عذاب أغنية الموسم قالي لا غلط».
وأردفت: «مكنتش فاهمة مشاكل الأسئلة دي وهي اعتبرتها حملة عليها.. وغضبت جدا وطلبت وقف أغانيها من الإذاعات المصرية والدنيا اتقلبت في مصر.. وتدخل الأستاذ محمد حسنين هيكل وحل الموضوع وحماني جدا».
وأكدت أنها حاولت التواصل معها عن طريق صديقة والدتها، مضيفة: «كلمتها في التليفون وعرفتها بنفسي إني بقدم ما يطلبه المستمعون مش وافق أو امتنع.. وطلبت منها إن أنا أرجع أنزل أغانيها تاني بعد كلام كل الناس دي عني.. وبعد محاولات كتير قالتلي أوعدك تكوني أول واحدة تذيع أغنياتي لكن بعد شوية.. ودعتني إني أشرب شاي معاها لأنها كانت مبسوطة بالمونتاج بتاعي لأغنياتها.. وبعد كل ده عرفت إنها أصلا كانت عارفة».
وفي وقت سابق، قالت الإعلامية القديرة سناء منصور، خلال حلقة اليوم من برنامج «ست الستات» المذاع عبر شاشة دي ام سي: «أنا أول ما عرفت إن حلقة النهاردة عن الرجالة عايزة إيه الحقيقة معرفتش هقول إيه لأني عمري ما فهمتهم.. أو يمكن مكانش عندي الوقت إني أفهمهم لأني كنت مشغولة بحاجات أخرى».
وأضافت، خلال الحلقة: «يعني أنا أكبر وأكثر خبرة منكم بس أنا عادة باخد الحالة اللي قدامي زي ما هي ومش بنخرب فيها علشان أعرف».
