بعد أزمة تصريحاته عن المعاقين..
أمير رمسيس: "معايا أدلة على تقصير المجلس القومي للإعاقة في حقوق ذوي الهمم"|خاص
خرج المخرج أمير رمسيس عن صمته ليعلق على الجدل المثار مؤخرًا بسبب تصريحاته عن ذوي الهمم، وقد أوضح مقصده من هذا التصريح في تصريحات خاصة لـ موقع نيوز رووم.
أمير رمسيس يوضح مقصده من تصريحه عن ذوي الهمم
حيث قال أمير رمسيس في تصريحاته: "أنا منشوراتي كان قصدي بيها الدفاع عن ذوي الهمم ولكن حصل سوء استخدام وفهم ليها، أنا السنة اللي فاتت كنت عايزهم يشاركوا في أعمال فنية وكان المجلس هو اللي بيصنفهم وبيقول مينفعش يعملوا الدور الفلاني، ومعايا فيديو وسكرين شوتس هتطلع في وقتها، عيب أن مؤسسات الدولة تسيئ أستخدام نظام الدولة، وأنا هتحرك إعلاميًا وهصدر بيان بعد قليل أوضح فيه كل ده، يعني أنا طلعت وهاجمت اللي بيسموا الكلاب، وكنت بشبه اللي بيحصل دلوقتي بالواقعة اللي حصلت أيام هتلر مش معنى كده أني بدعو لده، والناس من ذوي الإعاقة أنا اعرفهم ولما سمعوا اللي اتقال مع عمرو أديب قالولي اللي أنت قولته مالوش علاقة باللي المجلس بيقوله، والمجلس بيقصر في حقوق كتير من ذوي الهمم ومعايا أدلة على ده".
رد أمير رمسيس على المجلس القومي للإعاقة
وقد خرج المخرج أمير رمسيس في أول تعليق له على بيان المجلس القومي للإعاقة بشأن تصريحاته الأخيرة التي أثارت جدلًا واسعًا، وكتب أمير رمسيس عبر حسابه الشخصي على موقع التواصل الإجتماعي فيسبوك : "المجلس القومي للإعاقة مطلع بيان بيهاجم فيه إني قلت إن النازية كانت بتبيد أصحاب الإعاقات لأنهم عائق اقتصادي لنمو الدولة النازية، وإن منطق موت 40 مليون روح ده منطق نازي".
وتابع أمير : "نستنتج من هذا :
١ ـ اللي كتب البيان مخدش تاريخ في ثانوي
٢ ـ اللي كتب البيان عنده مشاكل في العربي
٣ ـ اللي كتب البيان كان مساند لمحرقة هتلر و هو شخصيا شايف إن سيرتها متجيش".
بداية الأزمة
وكان قد أثار المخرج أمير رمسيس الجدل بعد حديثه عن المعاقين في برنامج الحكاية الذي يقدمه الإعلامي عمرو أديب، حيث قال: “أنا لست نشط في أي جمعية من جمعيات الكلاب وأنا شخص بحب الكلاب وبعطف على الكلاب، وأنا لست رجل سبوبة وأنا رجل أرى أن الكلاب هي أرواح زيها زي البني أدمين وأعتقد أنه إحنا لازم نفكر إزاي نتعامل وأنا معترف أنه في مشكله في العدد وأنا ضد إعدام الكلاب وضد السم الجماعي للكلاب”.
