سيد علي يهاجم ظاهرة البودي جارد: «منظرة مستفزة وعقدة نقص»
علق الإعلامي سيد علي على انتشار ظاهرة البودي جارد، قائلا: «أنا بيستفزني موقف الحراسات البودي جاردات اللي ماشيين مع الشخصيات اللي إحنا مش عارفين طلعولنا منين سواء رياضية أو فنية لدرجة أنه رقاصة عادية ماشي معاها 6 جاردات يدخلوها الفرح ويخرجوها».
البعض تلاقيه موكب ماشي وراه
وأضاف، خلال تقديم برنامج «حضرة المواطن» المذاع على قناة الحدث اليوم، « على الرغم أنه أعرف أكبر رجال الأعمال في مصر هو اللي بيسوق عربيته ولوحده عادي ولا في جاردات ولا أي حاجة خالص والبعض تلاقيه موكب ماشي وراه حتى وهما داخلين الفرح أو حتى مأتم يعني منظر العربيات والبودي جاردات بدأ يبقى مستفز ومثير ومقرف ومقزز والناس دول عندهم عقدة نقص».
وتابع: « خاصة لأن أسماء أول مرة نسمع عنها ولا حد يعرفها ولو مشيو في الشارع ولا حد هيعرفهم ولا حد هييجي جمبهم إنما بدأت تبقى المنظرة، على العلم أنه لدينا وزارة داخلية قوية أوي وقادرة على بسط الحماية والأمان في كل ربوع مصر أنها تتدخل في تلك المظاهرات الكاذبة الخداعة اللي فيها كتير جدا من المنظرة للبودي جاردات والعربيات اللي ماشيين مع بعض الشخصيات مانعرفهمش أصلا».
وفي سياق آخر، علق الإعلامي سيد على على انتهاء إجازة العيد، قائلا إن المشكلة في مصر تكمن في الإجازات، إذ أنه يشعر أحيانا أن البلد خارج الخدمة في الإجازات، معلقا: «طبعا المشكلة اللي حصلت بتاعة ماكينات الصرف الآلي والتصريحات المستفزة اللي طلعت تتقال للناس يتناقض تماما مع فكرة البنك الرقمي والشمول المالي».
انفصال بين الواقع وما يحدث
وأضاف، خلال تقديم برنامج «حضرة المواطن»، المذاع على قناة الحدث اليوم: «هناك انفصال بين الواقع وما يحدث، المسألة دي الوحيد اللي حاطط عينه عليها هو الرئيس عبد الفتاح السيسي، في جاجات كتيرة جدا هو بيراهن على الناس إنما في ناس كتيرة جدا من قيادات هذا البلد بيقولو كلام حلو لكن الواقع اي؟».
أزمة ماكينات الصرف
وتابع: «ما حدث في ماكينات الصرف إنه تصادف نزول المرتبات مع العيد مع الإجازات مع المعاشات، لازم يكون في حالة طوارئ في الدولة ويكون جزء شغال يعني مفيش مانع إن يكون في وردية مسائي ومكاتب البريد تفتح بالليل، مفيش مانع عربيات التغذية بتاعة المكن تبقى موجودة».
