أنا امتحاني بكرة وبذاكر في الشارع.. صرخة طالبة بعد إخلاء عقار مائل في الجيزة

في واقعة إنسانية أثارت جدلا واسعا على مواقع التواصل الاجتماعي استغاثت إحدى الطالبات عبر تصريحاتها لـ "نيوز رووم" بإقامة ما يقارب 30 أسرة في الشارع، بعد إخلاء عقار مائل بكفر طهرمس التابع لمحافظة الجيزة.

وأوضحت خلال تصريحاتها: «من يومين في ناس كانوا بيشوفوا العمارة بتاعتنا علشان العمارة اللي جنبنا فيها شروخ شافوا العمارة وركبوا حاجات وخلاص مكانش في أي حاجة.. ورجعوا تاني بعدها بيومين قفلوا علينا كل المرافق الكهرباء والغاز وكل حاجة وبيقولوا لازم نخلي العمارة حالا وإحنا مش فاهمين حاجة ومحدش بيرد علينا».

وتابعت: «إحنا من إمبارح قاعدين في الشارع.. يعني العمارة اللي جنبنا قفلوها علشان فيها شروخ والحوائط واقعة.. لكن عندنا مفيش شقة من الـ 36 شقة فيها شرخ واحد يعني أنت مقعد أكتر من 30 أسرة وأطفال وفي ناس ثانوية عامة وأنا واحدة من الناس والله العظيم امتحاني بكرة ومذاكرتش حاجة.. إحنا بنبات في الجوامع والمحلات بتاعة الشارع ولسا هنقعد كده 3 شهور».

وواصلت: «كمان في محلات اتقفلت طب ما ده أكل عيش حرام ننتظر 3 شهور.. يعني أقصى حاجة قولي أسبوع أو 3 أيام والله هبات الـ 3 أيام في الشارع لكن ليه 3 شهور».

وفي وقت سابق، تفقد الدكتور أحمد الأنصارى محافظ الجيزة أعمال التوسعة والتطوير الجارية بشارع كفر طهرمس وتقاطعه مع شارع فيصل، وذلك خلال جولة تفقدية قام بها المحافظ ظهر اليوم الخميس بحى بولاق الدكرور.

وأشار المحافظ أن الأعمال تشمل توسعة الطريق بعد تنفيذ قرار إزالة لسور متعدى على خط التنظيم بالتنسيق مع جهة الولاية مما سيضيف مساحة ٥ م لعرض الطريق بطول السور والممتد لمسافة ٨٠ م.

وأضاف المحافظ أن الأعمال ستتضمن إعادة رصف الطريق وتوفير رصيف للمشاة، إلى جانب أعمال التخطيط المرورى وتنظيم الحركة بمعاونة الإدارة العامة لمرور الجيزة.

وأكد المحافظ أن الأعمال من شأنها تخفيف التكدسات وتحسين حركة المرور بشارع كفر طهرمس لكونه أحد المحاور العرضية الهامة والتى تشهد حركة مرورية كبيرة خاصة فى فترات الذروة.