خالد يوسف: لم أندم على المشاركة في 25 يناير.. والثورة واجهت مؤامرات
قال المخرج خالد يوسف: «مش ندمان على المشاركة في 25 يناير كفاية إنها خلصتنا من الإخوان لأن لولا 25 يناير مكانش حكم الإخوان ومكناش الشعب هيكتشف زيف مشروعهم وإجرامهم وينزل في 30 يونيو».
وأضاف، خلال استضافته في برنامج «كل الكلام» المذاع عبر شاشة الشمس: «يعني من الحاجات العظيمة اللي حصلت في 25 يناير النتائج المباشرة ليها إن مبقاش في تنظيم إخوان مسلمين ولا بقا أشواق لهذا الشعب لحكم هذا التنظيم لأنه كان بيستخدم المظلومية بتاعته وإنهم مش بياخدوا الفرصة.. يعني الحمدلله إنهم أخدوا الفرصة وانتهينا من فكرة الإخوان المسلمين».
وأردف خالد يوسف: «مندمتش لأن أنا ومن خرج في 25 يناير كنا نتطلع لوطن أحسن من اللي اتربينا فيه، كنا بنتطلع لبلد الحرية والعدالة والكرامة مش لحاجة وحشة.. كون إن الظروف فيها أخطاء من الناس اللي خرجوا نفسهم وكان فيه مؤامرات حصلت على الثورة من قوة مجتمعية ودولية وناس ليهم مصلحة إن مصر متقفش على رجلها.. وانتهت بعدم تحقيق أهداف الثورة لكن ده مش هيخليني أندم على فعل نبيل زي ده لأن كلنا كنا صادقين».
وتابع: «الرئيس جمال عبدالناصر كان على اتصال بالإخوان وحزب الفتاة والحزب الشيوعي وكل الأحزاب بحثوا عن سبيل لتحرير مصر.. ولما في الآخر لم يجد ضالته اتجه لعمل تنظيم الظباط الأحرار لتحرير مصر.. وخالد محيي الدين اليساري دخل تنظيم الإخوان المسلمين ولما سألته ليه قالي كلنا كنا بنبحث عن سبيل لتحرير مصر، لما حركة الإخوان قيدت حركة الجيش في 1952 جمال عبدالناصر لغى كل الأحزاب واستثنى حركة الإخوان المسلمين لكنهم غدروا بيه».
وفي وقت سابق، كشف المخرج خالد يوسف تفاصيل وكواليس قضية سرقة مجوهرات زوجته الفنانة التشكيلية شاليمار شربتلي والتي أدين فيها المخرج عمر زهران بحكم نهائي من محكمة النقض، مؤكدا أن القضية حسمت قانونيا بشكل كامل ولا يوجد مجال للتشكيك في الأحكام الصادرة بشأنها.
الناس بتطلع تقل أدبها
وقال خالد يوسف خلال استضافته في برنامج الحكاية من أولها المذاع على قناة «الحدث اليوم»، إن الأزمة ما زالت مستمرة حتى الآن بسبب الهجوم الذي تتعرض له زوجته عبر مواقع التواصل الاجتماعي، مضيفا: «ما زال ناس بتطلع تقل أدبها على شاليمار شربتلي وتقولها عمر بريء وانتي اللي افتريتي عليها، فأنا مش فاهم اللي الناس بتطلع تشتمها وتقل أدبها عليها ليها عين إزاي».
