بسبب السلفية والإخوان.. خالد منتصر: المريض بقى يثق في الدجال أكثر من الطبيب

رد الدكتور خالد منتصر على سؤال لماذا يثق المريض المصري في العطار والدجال ويكذب الطبيب، قائلا: «ظاهرة بتعود للعلم نفسه وبتعود للعقلية المصرية اللي اتربت على دا، مش العقلية المصرية كعامة يعني، بعد سيطرة الفكر السلفي على العقل المصري خلى عنده هذه القابلية».

العقلية المصرية اتربت على المطلق

وقال خالد منتصر خلال لقائه مع الإعلامي حمدي رزق ببرنامج «نظرة» على قناة «صدى البلد»: «العقلية المصرية اتربت على المطلق، هات من الآخر، ريحني، يعني الدوا ده حلو ولا وحش؟ خلاص وأنا لازم أخف».

وواصل منتصر: «العلم بيقولك جملة مهمة أوي "قد أكون مخطئاً فلنختبر ونجرب وندخل المعمل"، ده اللي العلم بيقوله واللي هيبقى تقيل على قلوبنا أوي، طيب، الدجل بيقول إيه؟ "أنا معي الحقيقة ولا تسأل أسئلة، الزجاجة دي هتاخدها هتشرب على الريق مرتين أو 3 هتبقى زي الفل، وتشفي كل الأمراض ولا تجادل».

واختتم قائلا: «أنت بين يدي هذا الدجال زي ما الإخوان كانوا بيقولوا كالميت بين يدي مغسله، متسألش، الميت بيسأل؟ لا مبيسألش».

وفي سياق آخر، رد الدكتور خالد منتصر على اتهامه بـ خدش الحياء ووصف المجتمع بالسواد بسبب سماسرة الطب وظاهرة الخرافة.

وقال خالد منتصر: «يظل السؤال في هذا الموضوع عن رأي الناس في الشارع، ده اللي يهمني، الوقود بتاع هذه الظاهرة، ووقود الظاهرة هو الخرافة التي وصلت للبيوت عن طريق الموبايل، متسائلا: لماذا لا يصل العلم عن طريق الموبايل؟».