مش مسامحاها.. رسالة نارية من سيدة تزعم وفاة ابنها لإهمال طبيبة بمعهد الأورام 

وجهت سيدة رسالة غاضبة ومؤثرة اتهمت خلالها إحدى الطبيبات بمعهد الأورام تدعى ساندرا بالتسبب في وفاة ابنها نتيجة الإهمال الطبي، مؤكدة أنها لن تسامحها على ما حدث لابنها.

مش مسامحاها لا دنيا ولا آخرة

وقالت السيدة، في تصريحات خاصة لـ«نيوز يووم»: «دكتورة ساندرا هي السبب في وفاة ابني، منها لله وحسبي الله ونعم الوكيل فيها، مش مسامحاها لا دنيا ولا آخرة، هي اللي سابت ابني من بالليل للصبح لوحده هناك».

وفاة الابن بسبب الإهمال

وأضافت أن الطبيبة لم تظهر إلا في ساعات الصباح، قائلة: «لقيناها ظهرت الدكتورة ساندرا حوالي الساعة 9 الصبح ودخلت على طول، مفيش بعدها 5 دقايق سمعت ابني خرجلي بيقولي سالم بيحتضر يا ماما، قبل الدكاترة ما تيجي، قالي ابنك بيحتضر ادخلي شوفيه».

مقدرتش أشوف ابني وهو يحتضر

وتابعت الأم حديثها وسط حالة من الحزن الشديد والبكاء: «والله ما قدرتش أدخل أشوف ابني، والله مقدرتش، ولا شوفته غير على ترابيزة الغسل. لما كنت بدخله في الأول كان يبصلي ويقولي: يا ماما انتي بتتهربي مني ليه؟ يا ماما، ومكنتش عايزة أقوله إني مش قادرة أشوفه بالوضع اللي هو فيه».

تفاصيل اللحظات الأخيرة قبل وفاة نجلها

وروت السيدة تفاصيل اللحظات الأخيرة قبل وفاة نجلها، مؤكدة أنها كانت تلاحظ تدهور حالته الصحية خلال الليل، وقالت: «لما ساندرا دخلت سمعت صوت السرير وبيقولوا حطوله أكسجين بسرعة ولما بقينا نقول للممرض في نص الليل إن ضربات قلبه بتزيد، دخل حطله الجهاز اللي بيتحط في الصباع اللي بيقيس الأكسجين، والجهاز اللي فوق عمال يجيب ضربات القلب 170 و180، وراح قعد يصفر وتنور اللمبة البرتقالي، وأنا كنت بطمنه».

انهيار وتساؤل حول مرتكب الذنب

واختتمت: «راح الممرض شال الفيشة لما لقاها عمالة تنور، وكنت بقول للممرض قوم شوفهالنا الدكتورة راح قال يا حاجة أعمل إيه؟ مش ذنبي طب ذنب مين؟ أسأل مين طيب في اللي حصل مع ابني دا؟».