«الزوج محتاج يتقدر».. استشاري علاقات زوجية تفتح النار على السوشيال ميديا
قالت الدكتورة هدى سالم استشاري العلاقات الأسرية، إن هناك أزمة في تقدير الزوجة لزوجها، مضيفة:« في رجالة بتحرم نفسها من الأساسيات علشان تجيب لأسرتها كماليات وحاجات مش مهمة».
الراجل ده محتاج يتقدر مش يتشكر
وأوضحت، خلال استضافتها في برنامج «الستات ميعرفوش يكدبوا» المذاع عبر شاشة سي بي سي: «الراجل ده محتاج يتقدر مش يتشكر، في حاجات بيتم الترويج ليها على السوشيال ميديا بتقول إن مهما يعمل الراجل كدا كدا ده العادي والشكوى اللي بتيجي من الرجالة كلها متكررة إن مفيش تقدير والزوجات بتقول ده العادي».
الأطفال بشوفوا إن كل مجهودات الأب واجب عليه
وأضافت: «كمان لما الكلام ده يتقال قدام الأولاد بيتخلق عندهم مفهوم إن اللي بابا بيقدمه ده مش حاجة كبيرة لا دي طبيعية يعني وعادي، وده مش صح إن الأطفال بشوفوا إن كل مجهودات بابا واجب عليه».
وتابعت استشاري العلاقات الأسرية: «أنا لما بشوف سيدات جاحدات القلب مش بيشوفوا إن الرجالة حقهم حتى يتعبوا.. أنا في رجالة بتقولي إنهم عايشين على الفطار طول اليوم واستخسر في نفسي الأكل والحاجة الحلوة علشان أجيب لبنتي فستان كان نفسها فيها.. مفهوم هو بيشتغل ويشقى علشان مين ده غلط لازم تقدري تعبه».
وفي وقت سابق، كشفت هدى سالم، مستشار أسري ونفسي، عن آليات الوصول للمرونة في التعامل مع المواقف الصعبة داخل العلاقات، مؤكدة أن الشخصية المتفاهمة تمثل صمام أمان للطرف الآخر، حيث لا يخشى شريكه الحديث معه في أي مشكلة، كونه يسعى دائما للوصول إلى نقاط تلاقي وحلول نهائية بعيدا عن الصدام.
الفرق بين المتفاهم و"المناطح" في العلاقات
وأوضحت هدى سالم، خلال لقائها مع شريف عبد البديع وشريف نور الدين في برنامج "أنا وهو وهي" على قناة صدى البلد، أن الشخص "المناطح" يرهق قلب شريكه ويستنزف طاقته في الجدال المستمر، لافتة إلى أن هذا النوع من الشخصيات يتم اكتشافه من الموقف الأول، بينما الشخص المتفاهم يسير بإيقاع متزن يمنح الطرف الآخر شعورا بالراحة والقدرة على المصارحة دون خوف من رد الفعل.
