جالي فيروس في المعدة.. مي عز الدين تكشف تفاصيل وعكتها الصحية
كشفت الفنانة مي عز الدين تفاصيل الوعكة الصحية الصعبة التي مرت بها، مؤكدة أن حالتها وصلت إلى مرحلة خطيرة بسبب انتشار الصديد داخل المعدة.
الصديد انتشر في المعدة كلها
وقالت خلال لقائها ببرنامج “صاحبة السعادة”: «الصديد انتشر في المعدة كلها، وخلى الأمعاء لزقت في بعض، وفعلاً نزلوا تحت تقريبًا واتحركوا من مكانهم، فما بقيتش أهضم، وقعد تقريبًا أسبوع، أي أكل بيدخل جسمي والأدوية وكل ده، أنا ماعنديش فكرة إنه عمال يعمل حالة تسمم».
وأضافت: «فجأة كانت بطني كبرت جدًا، ومافيش هضم وبتوجعني جامد قوي، لغاية ما صحيت بألم شديد جدًا وجسمي كله منمل، فهي كانت وصلت لحالة التسمم دي، فروحت على المستشفى».
وأوضحت أنها خضعت لعملية جراحية بالمنظار، قائلة: «عملت عملية بالمنظار، واللي شرحوا لي بعد العملية إنهم شالوا الصديد من المعدة كلها، والدكتور قال لي كده باللفظ، والأمعاء اتشطفت بمية من الصديد، ورجعوها مكانها تقريبًا، وبعدين في النص لقوا شوية حاجات تانية بسبب اللي حصل وشالوها، وعملوا شوية حاجات كده».
وتابعت: «الحمد لله ربنا كريم، لأن أنا وأنا بيتشرحلي الكلام ده قلت ربنا بيحبك، يعني ده أنتِ كنتِ بتروحي، فالحمد لله عدّت على خير، والحمد لله رجعت تاني أحسن».
كما تحدثت عن الساعات الأصعب داخل العناية المركزة، موضحة أن الطبيب صارحها قبل العملية بخطورة الوضع، وقال لها: «إحنا هندخل ونشوف إيه اللي حصل جوه، ولو اتفاجئنا بأي حاجة هنتعامل معاها، بس عايزك تبقي جاهزة لأسوأ السيناريوهات، يعني ممكن إن شاء الله تعدي على خير، وفي نفس الوقت تبقي عاملة حسابك إن الوضع اللي إنتِ فيه ده ساعات بيوصل لدرجة إنه بيخلي البني آدم بقية عمره طريقة الإخراج من جسمه بتتغير».
واختتمت حديثها قائلة: «أنا لما صحيت في العناية كان كل همي أعرف عملوا إيه، هرجع عادية ولا حصل حاجة من ده، بس الحمد لله طمنوني، وبس».
