حفيد نوال الدجوي يبرر دعوى الحجر عليها: هدفي حماية ممتلكاتها من السرقة
أثار منشور متداول بشأن قضية الحجر على الدكتورة نوال الدجوي حالة من الجدل، بعدما كشف عمرو الدجوي عن أسباب لجوئه إلى القضاء للمطالبة بتوقيع الحجر عليها.
وأكد الدجوي في منشور عبر "فيسبوك" أن دعوى الحجر لا تهدف إلى الاستيلاء على الممتلكات أو التحكم في أموال الدكتورة نوال الدجوي، كما يعتقد البعض، وإنما تُعد إجراءً قانونيًا يهدف إلى حماية أموال وممتلكات الأشخاص الذين تثبت عدم قدرتهم على إدارة شؤونهم المالية بسبب ظروف صحية أو ذهنية.
وأوضح أن القانون يشترط عرض الشخص المطلوب الحجر عليه على لجان طبية متخصصة لتقييم حالته ومدى قدرته على إدارة ممتلكاته، مشيرًا إلى أن الوصي الذي تعينه المحكمة لا يملك حق بيع أو التصرف في الأموال والعقارات إلا بعد الحصول على موافقات قضائية رسمية.
وبرر الحفيد تقدمه بالدعوى بوجود ما وصفه بـ"شبهات استغلال" تعرضت لها جدته خلال الفترة الأخيرة، مدعيًا استخراج توكيلات رسمية وإجراء تحويلات بنكية وعمليات بيع لبعض الممتلكات لصالح أشخاص محددين، وهي الوقائع التي قال إنها تستوجب التدخل القانوني لحماية مصالحها.
وقال فى صفحته عبر «فيسبوك»: «أخيرا هحجر علي جدتي و اسيطر عليها... و من هنا ورايح هكون أنا المالك الوحيد لكل حاجه وهصرف وأبعزق يمين و شمال، بس يا حبيبي بلاش سذاجه.. بطل تتفرج علي افلام و مسلسلات عبيطه فهمتك ان الحجر معناه كده.
قضية الحجر هي قضيه سيئة السمعه بسبب الأفلام و المسلسلات ... بس الحقيقه انها أقوي تشريع إتعمل لحماية ممتلكات اي إنسان أصبح غير واعي او غير قادر علي إدارة ممتكلاته بسبب حالته الصحية.
لما بترفع قضية حجر ... الدوله ساعتها بتعرض المريض علي لجنه متخصصه في الصحه النفسيه تحدد حاله المريض و مدي وعيه ... و كمان و مدي قدرته علي إدارة ممتلكاته ... ولو ثبت انه غير واعي او قادر ... هنا كلام تاني.
ساعتها الدولة بتعيين وصي علي الشخص اللي اصبح غير قادر علي إدارة ممتلكاته ... غالبا بيكون من الأقارب، أيوه ... يبقي انت عاوز تبقي انت الوصي، عشان تسرق أملاكها و تصرف و تبعزق في فلوسها ؟
عشان المشرع عارف ان دي مخاوفك، و شكوكك و إن ده وارد ... المشرع أعطي الحق للوصي في الاداره فقط، و بحساب ... بس الوصي لا يحق له البيع او التصرف لنفسه او للغير بدون أذن كتابي من النيابة / المحكمه المختصه ... يعني من الآخر حتي لو صرفت حاجه ... هيكون من جيبك الشخصي و تروح تقول لهم انا صرفت ايه و لو وافقوا يدفعولك.
بس تبيع لنفسك، تحول لنفسك ... ممنوع / مرفوض / مستحيل.
طيب أنا ليه رفعت قضية الحجر علي ماما نوال ؟
الإجابة سهله لأي عاقل ... هل يعقل نسيب الضحيه مع الناس اللي سرقوها ... هل يعقل ان لصوص دبرت و خططت و مثلت و سرقت خزائن من جوه البيت ... نسيب لها الضحيه و تكون تحت سيطرتهم الكامله و في بيتهم !
هل ده يعقل !!
يا جماعه راحوا بيها علي السجل المدني في نادي الحزيره عشان تعمل توكيلات رسمية في القضايا و الممتلكات و البنوك و الموظف رفض و قال دي ست غير واعية ... و فجأه تخرج التوكيلات من مدينة نصر مع ان جدتي لا بتروح مدينه نصر و لا تعرف حد في مدينه نصر ولا يعقل انها لما تفكر تعمل توكيل ... تروح تعمله في مدينه نصر !!
تفتكروا ليه التوكيلات اتعملت في مدينه نصر ؟ انتوا اللي تقولوا ...
طيب ايه اللي اتعمل بالتوكيلات دي ... اتعمل بيها تحويلات بنكيه مرعبه ماما نوال عمرها ما عملتها لا لزوجها و لا ولادها و لا لأي حد من أحفادها ... فجأه بالتوكيلات اتعملت تحويلات لحسابات نفس الحراميه !
بس كده ... لا ... تم بيع فيلات و عقارات و مدارس و ممتلكات بمئات الملايين لنفس الحراميه و بأسعار مضحكه ... يعني أبو ١٠٠ مليون والله تم بيعه بمليون و علي ٢٠ سنه بالتقسيط !!!
بس كده ... لا طبعا ... المؤسسه التعليميه اللي ماما نوال عملتها علي مدار اكثر من ٦٠ سنه بتنهار !!
تخيلوا مدارس ماما نوال اللي عمرها ما اخدت ملاحظه او لفت نظر من وزارة التربيه و التعليم و كانت مثال للتعليم الراقي المحترم ... يتم وضعها تحت الإشراف المالي و الاداري بسبب الاهمال و المخالفات و التجاوزات !!
تخيلوا ... سنه واحده فقط تحت ادارتهم من بعد غياب ماما نوال و وفاة أحمد الدجوي ... تنهار المؤسسات التعليمية و يتم وضعها تحت إدارة الدوله حفاظا علي مصلحه الطلبه !!
فهمتوا ليه لازم أحجر عليها ... متخيلين المهزله !
طيب ليه الحرامية بتعمل كده ... ايه تفسيرك للسعار اللي حصل لهم ده ؟
الشرع بيقول ان الابناء اللي بتموت قبل الابوين لا ترث ... و لان المرحومه ماتت و ماما نوال عايشه ... أصبحت البنات لا ترث ... وصلت ؟
أتمني أكون شرحت قدر المستطاع في البوست ده ... و الأيام اللي جاية هعرفكم كم السرقات و المهازل اللي حصلت في سنه واحده فقط».
