نرمين الفقي: خفت جدًا من شخصية "شمس" في مسلسل "النمر".. وغيرت صوتي بالكامل
كشفت الفنانة نرمين الفقي إنها كتير بتحس بالخوف والقلق قبل تقديم بعض الشخصيات، مؤكدة إن من أكتر الشخصيات اللي خافت منها كانت شخصية "شمس" في مسلسل "النمر" مع الفنان محمد إمام.
اشتغلت على شخصية “شمس” في مسلسل “النمر” بشكل مكثف
وقالت نرمين الفقي، خلال لقاءها عبر شاشة “القناة الأولى”، إن المخرجة شيرين عادل كانت متخوفة من طريقة تقديمها للشخصية بسبب طبيعة صوتها الرقيق، خاصة إن الدور كان لمعلمة شعبية، مضيفة: "شيرين عادل قالت نرمين إزاي هتمثل بطريقة الصوت بتاعها؟".
وأوضحت إنها اشتغلت على الشخصية بشكل مكثف، وكانت بتتمرن كل يوم علشان تقدر تغير صوتها وطريقة كلامها، مؤكدة إن المخرجة فوجئت أثناء التصوير بالتغيير الكبير اللي عملته في الأداء والصوت.
وأضافت إنها كررت نفس التجربة في مسلسل "أولاد الراعي"، حيث غيرت أيضًا "تون" صوتها وطريقة الكلام، لافتة إلى أن الأدوار الشريرة أو المختلفة بالنسبة لها "سلاح ذو حدين"، لأن بعض المشاهدين يفضلون رؤيتها دائمًا في دور الفتاة الطيبة.
وأكدت نرمين إن النوعية دي من الأدوار بتطلع طاقة مختلفة من داخلها، قائلة: "أنا ساعات أكلم الطاقة العكسية.. نرمين اللطيفة الرقيقة عايزة تحس شوية إنها جامدة، فما بصدق أطلع ده في التصوير".
وأشارت إلى أن الشخصيات الصعبة لا تذهب معها إلى البيت، موضحة أن وجود كلابها الصغيرة وأجواء المنزل يجعلها تنسى أي توتر أو طاقة سلبية مرتبطة بالشخصية فور انتهاء التصوير.
وفي وقت سابق، كشفت الفنانة نرمين الفقي عن مواصفات شريك أحلامها، قائلة إن الزواج قسمة ونصيب، كما أن هناك كثير من العقبات في الحياة قد يقع فيها الشخص، معلقة: «ممكن يجيلي رجل مرتبط أو متجوز وأنا مش خرابة بيوت».
وأضافت الفقي، «ممكن البيت نفسه يبقى فيه مشاكل بس أنا عقل الباطن وإحساس إن في ست ممكن تتوجع أو تتألم بسببي أنا معرفهوش، ممكن يبقى راجل منفصل بس أنا معرفش أنه منفصل وهنا أبقى أنا بعدت عن بني آدم فاكرة إني هكون زوجة تانية».
وواصلت: «عايزة راجل بمعنى الكلمة، اللي هو أخلع رداء الرجولة اللي أنا بحاول أبينه قدام الناس ولا أبقى سوى إني أكون امرأة».
وتابعت: «الواحد لما بيقعد فترة طويلة من حياته مش متجوز خلاص انت بتعتمد على نفسك في حاجات كتير، أنا مش عايزة راجل محصلش مفيش حاجة في الدنيا اسمها كده لإن أنا مش ست محصلتش، وكل واحد فينا عنده مشاكل، لكن يبقى راجل بمعنى الكلمة ويقدر يتحمل المسؤولية».
