باسم كامل يكشف الدور الحقيقي للأحزاب السياسية في حياة المواطنين
تحدث النائب باسم كامل عضو مجلس الشيوخ وأمين عام حزب مصر الديمقراطي عن دور الأحزاب الأساسية، قائلا: «دور أي حزب يكمن في وضع مجموعة من الأهداف والمبادئ ودي النقطة الأساسية اللي بيتجمع عليها أعضاء الحزب إن الحزب دا عنده مجموعة من المبادئ والأهداف، وبسعى للوصل إلى الحكم مش عشان أتحكم في الخلق أنا عايز أوصل للحكم عشان أنفذ المبادئ والأفكار اللي عندي ومقتنع بيها».
في السياسة مفيش صح وغلط
وأضاف في لقاء ببودكاست «الكلام على إيه»، عبر موقع «نيوز رووم» مع الإعلامية نهله عامر: «في السياسة مفيش صح وغلط، يعني مش أنا سياستي صح وسياسية الحزب التاني غلط، الحزب دا عنده أفكار وأقنع بيها عدد من الناس، والحزب دا عنده أفكار أقنع بيها عدد من الناس، بالتالي مفيش في السياسة تقييم اسمه دور صح ودور غلط».
أهم أدوار الأحزاب السياسية
وتابع: «من أهم أدوار الأحزاب السياسية إنها همزة الوصل بين المواطن والهيئة الحاكمة من أول النواب والوزراء بالحكومة بالجيش، والمواطن البسيط، الست الغلبانة اللي بتروح الشغل فمش عارفة تودي ابنها فين، بالتالي الحزب هيسمع المشكلة دي، فيبلور المشكلة».
وواصل: «بالتالي هيبلور المشكلة في إن يبقى في قانون يقول للشركات الكبيرة اللي فيها عدد من النساء إن لازم يبقى في حضانة، والفلاح لما يقعد يشتكي إنه عنده أزمة في السماد والتقاوي، بالتالي يتحرك للحزب اللي هيسمع المشكلة من المواطن ويتحرك عند المسؤول وينقلها للنخبة الحاكمة».
المواطن مش بالضرورة إنه يعرف يروح للوزير
واختتم: «المواطن مش بالضرورة إنه يعرف يروح للوزير يكلمه أو للرئيس يكلمه أو لرئيس المدينة، بس الحزب بيعرف يعمل الشغلانة دي، دا الدور الأساسي للأحزاب السياسية».
