ناصر منسي: قرار استبعادي من كأس العالم مؤلم.. وأنا من صغري زملكاوي

أبدى ناصر منسي مهاجم نادي الزمالك، حزنه الشديد على قرار استبعاده رسميا من قائمة منتخب مصر المشاركة بكأس العالم 2026، بعد أن تواجد في معسكرات الفراعنة بالشهور الماضية.

وقال ناصر منسي المتوج بلقب الدوري الممتاز مع نادي الزمالك خلال ظهوره التلفزيوني مع سيف زاهر:" بعد ماتش سيراميكا عرفت ان خارج قائمة المنتخب وعلمت بالخبر من زوجتي، والطبيعي ازعل، لكن الحمد لله على كل حال، ولكن دي وجهة نظر فنية، وبتمنى التوفيق لـ حسام حسن، وان شاء الله يفرحنا في كأس العالم".

وأضاف مهاجم الزمالك: "عملت فيزا لأمريكا لمدة 6 شهور عن طريق منتخب مصر، وبفكر اروح أمريكا عادي لمساندة المنتخب، معرفتش خبر استبعادي غير لما طلعت من الملعب، ومفيش حد من زمايلي في الفرقة اتكلم معايا، كنت اتمنى  التواجد وشرف لأي لاعب يكون موجود، ومكنتش اعرف ان اقطاي انضم، ووجوده طبعا فاجئني".

وواصل ناصر منسي هداف الزمالك: "فوجئت ان اشرف نصار رئيس البنك كلمني وقال لي اننا ادينا "شيك" لنادي الزمالك لضمك، ومحدش كان اتكلم معايا، واتكلمت مع الكابتن عبدالواحد السيد، وكنت مستغرب، طيب حد يأخد رأيي، وقولت للكابتن انا بحب الزمالك ومش هامشي، انا بحب الزمالك وعايز اكمل".

وتابع ناصر منسي: "الكابتن عبدالواحد رد عليه وقال لي "هاطلع اتكلم معاهم وان شاء الله مش هتمشي".. وبعدين خلاص انت مكمل معانا وركز في اللي جاي، وربنا كرمني بهدف في السوبر الافريقي، ومستر جوميز كان مصمم أن اكون معاه".

وأختتم ناصر منسي حديثه قائلا:" "الفلوس طبعا كويسة في البنك، لكن الزمالك طعم تاني في وجود جمهور عظيم، وانا زمالكاوي يعني زمالكاوي بموت في حاجة اسمها الزمالك.. طول عمري زمالكاوي".