من عنف البيت إلى التهديد العلني.. أسرة تستغيث بالداخلية: «طليقي بيهددني بالقتل

نشرت سيدة تدعى منة فكري عبر حسابها على فيس بوك منشورا مطولا تحدثت فيه عن خلافات حادة مع طليق شقيقتها، مؤكدة أنه تسبب في أزمات أسرية ممتدة، وأن الأسرة اضطرت للتدخل أكثر من مرة وحماية شقيقتها وأطفالها.

وقالت في منشورها إنها تتعرض وأسرتها لاعتداءات وتهديدات متكررة، مشيرة إلى أن الخلافات وصلت إلى مراحل قضائية، وأن المحكمة أصدرت حكما لصالح شقيقتها في بعض الجوانب المتعلقة بالسكن والأثاث.

وأضافت: «آسفة في الإطالة بس محتاجين مساعدة الشخص ده طليق اختي، عشان خسارة فيه كلمة بني آدم كان بيخونها وبيضربها ضرب تعذيب حاول يقتلها 3 مرات، وكنا بنروح نلحقها من تحت إيده في آخر لحظة لما الجيران يتكلموا لما يسمعوا صوتها سلك كهربا وشومة وساطور ومكواة وسكينة ويفتح عليها أنبوبة البوتاجاز ويقفل عليها وهي نايمة».

تابعت: «وطبعًا مكنش بيصرف على بيته ولا عياله ولا حتى إيجار الشقة وكان بيصورها وهما في بيتهم ويهددها بالصور إنه هيبعتها على النت ويفضحها عشان ترجع له غصب عنها كان بينصب على ناس في فلوس ويهرب، والناس تتهجم عليها هي في البيت، وواحد في مرة مسك ابنها كان عايز يرميه من الشباك وكل الفلوس دي كان بيسدها والدي من فلوس ناس لإيجار لنور لمية لأكل وشرب حتى لبس المدارس ولبس العيد استحملناه كتير وكنا كل مرة بنرجعها عشان الأطفال كتير طلبنا الطلاق وكان يفضل يعيط ويقول لا بحبها ويبوس إيدها ورجلها عشان تسامحه».

استكملت: «ولما فاض بينا منه ومن عمايله وقلنا طلق، كان بيرفض ويقول تبريني من كل حاجة وأطلق، ولما رفضنا بدأ يتكلم في شرفها وبيقول احنا صعايدة، وهو حرفيا عار على الصعايدة، هو في صعيدي يقبل رجال غريبة تدخل على مراته البيت بسببه وهو هربان؟ وفي الآخر بيشتم والدي اللي شال بيته وعياله 15 سنة، وبيتهجم علينا كل شوية ويفتح لايفات يشتمنا وينزل صورنا على النت ويشهر بينا (حاليا ماسح كل ده بس كله معايا سكرينات ولايفات».

واوضحت: «بيقول إن والدي سرق شقته وفلوسه وهو حرفيا شحات ولو معاه جنيه بيصرفه على الحشيش والخمرة ويبعت فلوس لستات على النت عشان يبعتوله صورهم عريانين وسيب عياله جعانين ولحد آخر لحظة كنا عاملين حساب لعياله، بس هو كان مستغل سكوتنا ده بمنتهى القذارة ويقولنا اقعدوا مع رجاله عيلته، وإحنا بقالنا 15 سنة مش لاقين له راجل نشتكيله أصلاً حاولنا معاه كتير أوي انفصال بالمعروف كرامة للأطفال، بس هو لا يعرف أدب ولا معروف رفعنا عليه قضية والحكومة طلقته منها وحكمت لها بالشقة والعفش وبرضو كل شوية بيتهجم على والدي في محل أكل عيشه ويتهجم عليها في الشقة وأخواته اتهجموا علينا في البيت بكلام قذر في شرفها عشان نتنازل عن كل حاجة».

اختتمت: «كل ده معانا بالدليل صوت وصورة ومعانا فويس بصوته إنه كل اللي بينزله على النت غيظ مننا وإنه كله كذب وبكل بجاحة يقول عايز شقتي وعفشي اللي حتى إيجارها مش بيدفعه ومطلبش عياله زي ما طلب الشقة عشان عارف إنه شخص لا يطاق وأهله مش هيستحملوه خدنا كل الإجراءات القانونية ضده، بس قالنا أنا مبخافش من الحكومة، وإحنا عشان ناس محترمة وملناش في المشاكل وأول مرة ندخل أقسام كانت بسببه، ومش عارفين نعمل معاه إيه تاني هو اسمه أحمد علي حسين والشهرة حموكشة ساكن في الأربعين عين شمس الغربية».