ياسر جلال: 80% من الفنانيين عايشين على الإعانات |فيديو
كشف الفنان ياسر جلال، عن تمنيه بتفعيل حق الأداء العلني، لتحسين أوضاع الفنانيين، واستفادة الدولة، وهو ذاته المقترح الذي قدمه في مجلس الشيوخ.
وقال ياسر جلال، في تصريحات خاصة لـ "نيوز رووم": "حق الأداء العلني، هو حق ضايع على الفنان وعلى الدولة".
وأضاف ياسر جلال: "لأن تحصيل حق الأداء العلني دلوقتي بقى خلاص ماشي في العالم كله، وعلى حسب القانون رقم 82 لسنة 2002 اللي هو حق المؤلف في الحقوق المجاورة، اللي هو إحنا، اللي هم فنانو الأداء الممثل، المخرج، الراقص، العازف.. دول ليهم حق الأداء العلني".
وتابع ياسر جلال: "في فرق ما بين الأجر وحق الأداء العلني، الأجر ده مقابل عمل إنت عملته أخدت أجر عليه، لكن مع إعادة بث العمل الفني على أكتر من منصة، سواء كمان على وسائل التواصل الاجتماعي أو المنصات أو القنوات المختلفة، في مقابل لازم يُدفع للفنان علشان يقدر يعيش حياة كريمة".
وأوضح ياسر جلال: "إحنا 80% من الفنانين من أعضاء النقابة عايشين على الإعانات، وأنا آسف إني أقول كده، بس ماينفعش إننا نشوف زمايلنا في الموقف ده ونسكت، في دول سبقتنا، يعني المغرب مثلًا حققت فيه طفرة، بتجمع مبالغ رهيبة طول السنة وبالعملة الصعبة".
واستكمل ياسر جلال: "إحنا أعمالنا مغطية كل العالم العربي، فالدولة ده حق ضايع عليها لأنها هتاخد من المبدع ضرائب، هتاخد على الأقل 25%، اللي هيحصل حق الأداء العلني لا النقابة ولا وزارة المالية، اللي بيحصل حق الأداء العلني في العالم جمعية اسمها "الوايبو" تابعة للأمم المتحدة.
ياسر جلال: عايزين نلزم القنوات بدفع حق الأداء العلني
وأسترسل ياسر جلال: "الجمعية دي في جمعيتين في مصر هنا للوايبو وبيمثلوها جمعية مؤلفي الدراما العربية بيرأسها الكاتب أيمن سلامة، وجمعية أبناء فناني مصر وبيرأسها المستشار ماضي توفيق الدقن ابن الأستاذ توفيق الدقن، ودول مشيوا مشوار طويل علشان ياخدوا الترخيص إنهم يتحولهم المبالغ دي".
وأكمل ياسر جلال: "إحنا عايزين نلزم كمان القنوات إنها تدفع حق الأداء العلني، هيبقى بسيط، لأن ده هيتخصم من الأعباء الضريبية اللي عليهم، يعني مش هيبقى فيه أعباء عليهم، هيتخصم من الأعباء الضريبية".
واختتم ياسر جلال: "إحنا كمان مابنعرضش أعمال أجنبية، إحنا عندنا درامتنا هي اللي بتتعرض بره، فإحنا هيبقى المقابل المادي للدولة كبير".
