المطربة منة سري تكشف عن تعرضها للسرقة والتهديد من سائق تطبيق ذكي

كشفت المطربة الشابة منة سري، عن تعرضها للسرقة من قبل أحد سائقي التطبيقات الذكية، عبر حسابها الرسمي على موقع التواصل الاجتماعي "فيسبوك".

وكتبت منة سري، قائلة: "أنا طالعة أتكلم عشان أحذر أي حد ممكن يتحط في نفس الموقف اللي اتحطيت فيه، أنا اتعرضت للسرقة والتهديد بعد رحلة من خلال تطبيق ذكي، وتفاجئت بعد كده إن بيانات العربية والسواق مختلفة تمامًا عن اللي موجود على الأبلكيشن".

وأضافت منة سري، قائلة: "كنت راجعة من شغلي في الجونة، والباص نزلني ميدان سفنكس طلبت العربية وركبت من عند البنزينة اللي قبل البالون، بعد ما اتحركنا، السواق قالي إنه دايخ وسألني إذا كنت بعرف أسوق".

وتابعت منة سري، قائلة: "خفت يحصل حادثه أو يجراله حاجة، فنزلت وسوقت مسافة بسيطة جدًا لحد ما قالي انا كويس وصلنا عند سفارة فنلندا في دقي علي كورنيش، وبعدها قالي إنه بقى كويس وهيكمل هو السواقة".

وأكملت منة سري، قائلة: "أثناء الرحلة شاف الباسورد بتاع موبايلي لما كنت بشحنه، لما نزلت من العربية وأنا بلف أركب ودا هتلاقوا في الفيديو، العربية جريت فجأة وأنا إيدي لسه ماسكة الباب، واتسحبت على الأرض واتعورت جامد في إيدي ورجلي".

وأردفت منة سري، قائلة: "أتسرق مني موبايلي، الآيباد، الإيربودز، فلوس، الشواحن، المحفظة ،وشنطة السفر بكل اللي فيها من هدوم  وجزم وميكب وحاجتي الشخصية".

واستكملت منة سري، قائلة: "بعدها تم استخدام موبايلي في طلب فلوس من أصدقائي، وللأسف أحد أصدقائي بالفعل بعت 15 ألف جنيه وتم تهديد أختي وطلب 50 ألف جنيه مقابل رجوع الحاجة وكمان كل يوم بيتم محاولات لفتح حساباتي والبنك والـ insta Pay."

وأكدت منة سري، عل اتخاذها للإجراءات القانونية، قائلة: " في نفس اليوم عملت محضر في قسم الدقي رقم 4667، وهناك عرفوا رقم العربية ونوعها واكتشفوا إنها مختلفة عن بيانات التطبيق، وكمان عملت محضر في مباحث الإنترنت رقم 30، وكل التفاصيل والأرقام مع الجهات المختصة".

واختتمت منة سري، قائلة: "خلو بالكم جدًا ومتفتحوش أي باسورد قدام أي حد حتي لو مش متخلين انه مش واخد باله ، ومتثقوش ومتصدقوش في أي موقف غريب حتى لو الشخص باين عليه محتاج مساعدة".