عبد الرحمن أبو زهرة يكشف تفاصيل وفاة والده: «مشيت في جنازته وأنا مش عارف»
قال الفنان عبد الرحمن أبو زهرة: «أنا أساسا مولود في دمياط عام 1934 ووالدي كان مدرس لغة عربية وانتقلنا إلى القاهرة، وبعدين هو اتوفى والتكنولوجيا كانت غير متوفرة، وطلعله خراج في قفاه وعنده السكر وميعرفوش فضربوا السلاح وصعد إلى بارئه».
مشيت في جنازة أبويا وأنا مش عارف
وأضاف أبو زهرة، خلال تصريحات تلفزيونية سابقة مع الإعلامي عمرو الليثي، عبر قناة «النهار»: «أنا كنت صغير ومشيت في جنازة أبويا وأنا مش عارف مين اللي مات، مكانوش قالولي خالص إن أبوك مات، احنا كنا أسرة متوسطة لكن عايشة والجنيه وقتها كانت قيمته عالية أوي».
وتابع: «كنا مأجرين شقة أوضتين وصالة بـ 2 جنيه، وشقة جميلة جدا وفي شارع الجيش، ومن الوقت للتاني بحن إني أروح أتفرج على البيت دا بتاع الماضي، وآخر مرة لقيتهم هدوها».
في وقت سابق، استعادت مي ابنة الفنان الكبير عبد الرحمن أبو زهرة ذكرياتها مع والدها بعد دخوله المستشفى منذ اكثر من شعر ونصف.
وقالت ابنة الفنان الكبير، في البودكاست الخاص بها افتح قلبك: “بابا شخص هادي جدًا، وكان دايمًا سايب لينا حرية الاختيار، ومش هقدر أنكر إن اختيارتنا مكنتش بتبقى أفضل حاجة، ولكني مع أولادي بقيت أوجهم بشكل مباشر أكتر.. والدي كان بيسيبنا على راحتنا ومكنش بيقول رأيه بشكل مباشر، كان بيعبر عن رأيه بشكل صامت، وأنا أكتر واحدة كنت قريبة منه من وأنا صغيرة وعرفت أحتويه، وعلشان كده كان يقولي أنا بحبك أكتر من إخواتك".
وتذكرت موقف والدها حينما ارتبطت وقالت: “اتخطبت وعمري 14 سنة وبابا زعل جدًا وفضل أسبوع ميكلمنيش لأنه ماكنش موافق، كان عايزني أكمل تعليمي في فرنسا،للأسف أقنعناه بحاجة غير كده واتجوزت بدري، ولكني وعدته بأني هخلص الليسانس والدكتوراه وفعلًا عملت كده، ولما خدت الدكتوراه حضني حضن عمري ما هنساه في حياتي”.
وتابعت: “حاول يقف معايا قبل طلاقي ويصلح لكن لما أصريت على الطلاق وقف معايا، ويوم الطلاق حصل مشاكل مع طليقي وأهله فقال لي اتنازلي عن كل حقوقك واخلصي بدل ما ندخل في قضية خلع واشتري دماغك، وبالفعل عملت كده وسافرت كندا وصرف عليا سنة أنا وأولادي..كان بيتبسط لما بيدي فلوسه لأولاده وأحفاده والناس اللي بتشتغل معاه، لما تعبت وجالي اكتئاب مكنش مصدق إن حصلي كده لغاية ما ولادي والدكاترة شرحوا له جالي وقعد معايا بدون ما يناقشني في أي حاجة.. إحنا ممتنين أنه قعد وعاش معانا الفترات دي”.
