نبيلة عبيد: كنت عايزه أزور هاني شاكر وقت تعبه.. مراته قالتلي الزيارة ممنوعة

قالت الفنانة نبيلة عبيد إنها ما زالت تعيش حالة حزن شديدة بعد رحيل هاني شاكر، خاصة بعدما تابعت رحلة مرضه الأخيرة عن قرب من خلال تواصلها المستمر مع زوجته نهلة توفيق.

هاني شاكر كان عزيز عليا جدا

وقالت نبيلة عبيد، خلال مداخلة هاتفية ببرنامج «كل الكلام» على قناة الشمس: «مش عايزة أقول الكلام التقليدي اللي بيتقال، لكن هاني شاكر كان عزيز عليا جدا، وكنا جيران زمان، وكل ما نشوف بعض كان دايما يبقى فيه ود ومحبة».

وأضافت أنها كانت تتابع الحالة الصحية لزوجته نهلة توفيق يوميا خلال وجودها في باريس، موضحة: «كنت عايزة أسافر، ولما عرفت إن هاني شاكر هناك قلت أأجل السفر يومين تلاتة يمكن يحصل تحسن، وكل يوم كنت بكلم نهلة ألاقي صوتها تعبان».

هتيجي تشوفي إيه؟

وتابعت الفنانة الكبيرة: «قلت لها عايزة أجي أشوفه، قالتلي جملة وجعاني لحد دلوقتي: "هتيجي تشوفي إيه؟.. تعبان وعلى أجهزة وممنوع الزيارة".. الكلمة دي أثرت فيا جدا».

وأشارت إلى أنها ذهبت بالفعل إلى المستشفى لكنها لم تستطع الصعود لرؤيته، قائلة: «روحت وقفت تحت المستشفى، لكن ماقدرتش أطلع، الكلمة كانت مأثرة فيا جدا، وماقدرتش حتى أفتح باب العربية أو أتحرك».

مريت بنفس التجربة مع أمي

وأكدت أن تجربة المرض داخل المستشفيات تمثل لها معاناة نفسية كبيرة بسبب ذكرياتها مع والدتها، مضيفة: «أنا مريت بنفس التجربة مع أمي، وكنت بتعذب جدا وأنا بشوفها على الأجهزة، عشان كده كنت حاسة بوجع نهلة جدا وعايزة أبقى جنبها».

ووصفت نبيلة عبيد الفنان الراحل بأنه كان يتمتع بأخلاق رفيعة وشخصية راقية، قائلة: «هاني شاكر كان إنسان راقي جدا ومهذب، وعمرنا ما سمعنا عنه مشكلة أو إساءة لأي حد».

آخر لقاء جمعها بهاني شاكر

كما استرجعت آخر لقاء جمعها به، موضحة أنه كان خلال زيارة مع أصدقاء مشتركين، وكان يبدو بصحة جيدة ويتعامل بلطفه المعتاد، مضيفة: «كان لطيف ومجامل جدا، وإنسان بمعنى الكلمة».

ووجهت رسالة دعم لزوجته، قائلة: «ربنا يقوي نهلة عشان تقدر تكمل المشوار، خصوصا إن عندهم أولاد وأسرة».