«عملية انتحارية».. مصطفى كامل يكشف تفاصيل الأيام الأخيرة في حياة هاني شاكر

كشف مصطفى كامل نقيب المهن الموسيقية عن عملية انتحارية لأمير الغناء العربي الراحل هاني شاكر في مستشفيات باريس، قائلا: «الأستاذ هاني دخل عنده نزيف حاد جدا، راح المستشفى عنده نزيف حاد، اتنقل له صفائح دموية كثيرة جدا، لغاية الساعة 3 بالليل كانت الدنيا تمام وتم وقف النزيف واطمنا».

تكرار النزيف بغزارة

وأضاف مصطفى كامل، خلال مداخلة هاتفية مع الإعلامي عمرو أديب ببرنامج «الحكاية»، المذاع على قناة «إم بي سي مصر»: «وكان في فجر أول أيام رمضان الساعة 9 الصبح اتكرر النزيف بغزارة شديدة جدا بشكل غير عادي، وحصل توقف لعضلة القلب».

توقف في عضلة القلب لـ هاني شاكر

وتابع: «لما اتنقلت الصفائح الدموية دي بالشكل المكثف ده، حصل توقف في عضلة القلب، قعدوا بقى يكتبوا توقف 10 دقايق و8 دقايق و3 مرات.. الكلام ده كله كلام فارغ وغير حقيقي. عضلة القلب توقفت مرة واحدة فقط، واتعمل على طول حاجة اسمها «فري سايلز» وانتعش القلب فورا، يعني الناس اشتغلت على القلب، ومن هنا لما قلقوا جدا اتاخد قرار عمل العملية اللي هي استئصال القولون بالكامل».

وواصل: «أنا مش عارف في عبارة، أنا آسف، هل يصح لي إن أنا أقولها ولا لا، لكن أنا مضطر أقولها، الدكتور الراجل المحترم اللي عمل العملية ده قال لمدام نهلة وإحنا واقفين: «أنا داخل أعمل عملية انتحارية.. ربنا يستر».

عملية انتحارية في باريس

وأكمل: «ربنا وفق الراجل ده، اللي داخل بهيموجلوبين واطي وعضلة قلب متوقفة وسيولة الدم مش عارف إيه، وكل ده العملية كانت صعبة جدا في النهاية الحمد لله رب العالمين العملية نجحت وخرج هاني بالسلامة».

وأكد: «وبعدين عشان أكون صريح جدا، حصل شوية مشاكل في وظائف الكلى مرة واحدة بدون سبب، واتظبطت تمامًا. بالليل كان كل حاجة تمام، لدرجة إن كل المتخصصين اللي جم زاروا هاني، وعلى رأسهم الدكتور خالد عبد الغفار وزير الصحة، قالوا إن اللي اتعمل في المستشفى كان معجزة طبية بكل المقاييس».

الانتقال ليس قلة حيلة

وأشار: «السفر بقى حصل ليه؟.. على عكس ما بيتكتب في الصحافة، لا هو تقصير ولا هو قلة حيلة ولا هو خروج من بلدنا لبلد تانية عشان عندنا أطباء مثلا.. لا والله».

وواصل: «حصل ضعف في العضلات ومحتاج تأهيل عضلي وسألنا هل ينفع ننقل هاني؟ قالنا بمنتهى الأمانة: «هاني زي الفل، هاني تمام». بدليل يا لو كان الأستاذ هاني هنا في أي قصور طبي، طبيعي جدا ما تقدرش تنزل بيه من مستشفى تروح مطار، تركب طيارة، تنزل من طيارة، تروح مستشفى».

وأردف: «وتم نقله إلى باريس عشان المكان المتخصص ده، اتنقل الأستاذ هاني للسنتر ده في باريس، وبعد السفر على طول قعد 10 أيام تأهيل.. هاني كان ابتدأ يشتغل على العجلة، يعني ابتدأ يحرك رجله على عجلة كده، وخلاص الدنيا تمام».

مشوار عمر بين مصطفى كامل وهاني شاكر

واختتم: «مرة واحدة حصلت حاجة، ضيق في التنفس. يعني اللي إحنا بنعاني منه دلوقتي هو ضيق في التنفس.. كل اللي أقدر أقوله لحضرتك، واللي لا أمتلك غيره، إن الأمانة الأخوية اللي بيني وبين هاني، ومشوار العمر اللي بيني وبينه، يجبرني أقول لك: ادعوا له بس.. ادعوا له بس.. بلاش أخبار كاذبة. ده مش وقت تريند».