شوبير ينفعل على الهواء بسبب توروب: مش هتعلمونا المهنية وكلكم بتوع انفرادات

انفعل الإعلامي أحمد شوبير، على الهواء خلال برنامجه “الناظر” والذي يذاع على قناة “النهار” الفضائية، وذلك بسبب استمرار أزمة مجلس الإدارة في كيفية إنهاء عقد المدرب الدنماركي ييس توروب ورحيله، والذي بات مطلبا جماهيريا في ظل سوء النتائج وإحتمالية بقوة خروج الفريق الأحمر خالي الوفاض من التتويج بأي بطولة في الموسم الجاري 2025-2026.

موسم صفري 

وودع الأهلي منافسات دوري ابطال أفريقيا من الدور ربع النهائي، كما فشل في التتويج بلقب كأس مصر وكأس الرابطة، بخلاف ضعف فرص تتويجه بلقب درع الدوري الممتاز، مع استمرار تصدر غريمه التقليدي الزمالك قمة صدارة جدول ترتيب البطولة قبل مباراة واحدة على جولة نهاية المسابقة المحلية، والتي تقرر إقامتها في توقيت واحد يوم 20 من شهر مايو الجاري.

كلكم بتوع انفرادات 

وقال شوبير في برنامجه الناظر:" انتوا مش هتعلمونا المهنية في الشغل ورغم ذلك انتوا كلكم اصحاب كل الانفرادات كلكم شطار وكلكم بتوع انفرادات، لكن انا هنا من شهر ذكرت أن الأهلي مش هيعرف ينهي التعاقد مع توروب إلا مع بداية الموسم الثاني دا لو هياخد 3 شهور شرط جزائي، و كمان قلت ان في مشكلة في الناس اللي صاغت العقود وعلشان متزعلوش كلكم شطار وكان عندكم الانفراد دا".

ممنوع على الأهلي 

وأضاف الإعلامي أحمد شوبير قائلا:" الحقيقه كمان ان ممنوع ان الاهلي يتفاوض مع مدير فني ف العلن في وجود توروب و دا اللي موجود حاليا ، الناس في النادي منتظرين ماتش المصري يخلص علشان يقعدوا معاه و يشوفوا صيغه مناسبة للطرفين".

غضب الإدارة من توروب 

وأختتم قائلا:" بعد ما ينتهوا من كل دا و الراجل يرحل الاهلي يبدأ يعلن عن مفاوضاته مع مدير فني جديد ، مش زي اللي بيقولك الاهلي يخلص الدوري يوم 20 يعلن عن المدرب يوم 21 مفيش كلام من دا خالص هيحصل ، بعيدا بقي عن ان العقد معمول بشكل غير مقبول او صياغته فيها مشكله لكن دا اللي هيحصل ، الراجل امبارح فتح النار علي الادارة والصفقات و قال انا مختارتش الصفقات و الناس ف النادي مستائين جدا جدا من كلامه و قالوا الراجل فضل راكن اللاعيبه جنبه واما لعبوا غيروا الشكل جاي يعمل كدا اخر ماتشين".