«عيب نقول للناس متاخدوش الدوا».. عمرو أديب يرد على الجدل حول حقنة الدقيقة

علق الإعلامي عمرو أديب على الجدل المثار حول حقنة الدقيقة الواحدة التي تستخدم في بريطانيا لتقليل زمن علاج بعض حالات السرطان، وذلك خلال تقديمه برنامج «الحكاية» المذاع على قناة MBC مصر.

الوعي عند البعض قاتل وانهياري

وقال أديب إن انتشار بعض المعلومات غير الدقيقة على مواقع التواصل يمثل خطورة على وعي المواطنين، مؤكدا أن هناك من يوجه الناس لرفض العلاج دون أساس علمي، مضيفا: «أنا شايف إن الوعي عند البعض قاتل وانهياري، عيب نقول للناس متاخدوش الدوا خصوصا إن الأدوية موجودة ومصر ماشية بمعايير واضحة».

وأشار إلى تجربته الشخصية مع السفر خارج البلاد للحصول على أدوية لوالدته سابقا، موضحا أن توفر العلاج حاليا داخل الدولة يعد تطورا مهما لا يجب التقليل منه أو التشكيك فيه.

في وقت سابق، علق الإعلامي عمرو أديب، على خطورة نظام الطيبات الذي روج له الطبيب الراحل ضياء العوضي، قائلا: «الناس اللي عندها سكر لو وقفت إنسولين هتموت، واللي بتاخد كيماوي هتتبهدل، واللي عنده ضغط هيحصله بلاوي.. الموضوع مش هزار».

تذهب الحرية للجحيم

وانتقد فكرة «الحرية الشخصية» في هذا الموضوع،: «تذهب الحرية للجحيم في الحتة دي.. دي مش حرية، دي حياة ناس.. اللي بيقول حرية.. جرب يمكن ربنا يكرمك».

وتابع خلال حلقة اليوم من برنامج الحكاية: «كل واحد بيتعالج حالة غير التانية، مش معنى إن حد قال حاجة نمشي وراه وخلاص، لو انت تعرف واحد اتعالج أنا أعرف 100 ماتوا بسبب الكلام ده، مواصلا: «اللي بيروج للكلام ده شريك في الجريمة.. شريك في قتل طفل أو ست أو راجل كبير».

وأضاف: «إحنا بقينا نقول ما تفتيش في الكورة، إنما نيجي في الطب نفتي في السرطان والسكر والدهون.. يجب الضرب بيد من حديد.. أنا مش هسكت ومش هخاف».

وتابع: إحنا في بلد بتبني مستشفيات وبتصرف مليارات على التأمين الصحي، وحملنا مستشفى 57 على كتافنا اللي الأطفال واقفين فيها طوابير عشان الكيماوي وانت بتقولي وقف كيماوي، مش معقول تيجي تقول للناس سيبوا العلاج ويموتوا».

وأضاف: «أنا مش واقف عند ضياء العوضي، أنا واقف عند وعي مصر اللي باظ.. اللي مضايقني مش هو، اللي مضايقني إن الناس اللي بتصدق، وانتقد الوضع في مصر مقارنة بالدول الأخرى: «هو في السعودية أو الإمارات أو أمريكا حد بيمش ورى الخرافات دي.. بس بيحصل في مصر.. احنا بنجرب في نفسنا».