نقابة الأطباء: منع الأنسولين عن الأطفال جرم وممارسات ضياء العوضي كارثية
أكد الدكتور شادي صفوت، عضو مجلس نقابة الأطباء، أن النقابة لم تكن غائبة عن المشهد بل كانت تتابع تجاوزات الطبيب الراحل ضياء العوضي وتتخذ الإجراءات القانونية اللازمة حيال خروجه عن مقتضيات المهنة، قائلا: «الأمر ما جاش بالطريقة دي في الأول، لما بيجي بيتكلم عن أي حد بيتكلم عن نظام غذائي هو من حقه إنه يتكلم عن نظام غذائي من ناحية التغذية لو هو معاه حاجة خاصة بالتغذية، لكن المشكلة ابتدت تتفاقم في حالة المنع عن الدواء، إن أنا في عيان مريض سكر وخصوصا لو طفل من النوع الأول وأمنعه إن هو ياخد الدوا بتاعه هو ده اللي بيعمل المشكلة وده جرم».
كواليس التحقيق وقرار الشطب النهائي
وأوضح الدكتور شادي صفوت، في مداخلة هاتفية مع الإعلامي أحمد موسى ببرنامج «على مسؤوليتي» المذاع عبر قناة «صدى البلد»، أن الطبيب الراحل خضع لإجراءات تأديبية صارمة، لافتا إلى أنه: «تكلم في تخصصات غير تخصصه بالنسبة للكلى بالنسبة لأمراض السكر بالنسبة للأمراض المناعية بالنسبة للسرطان وكلها خارج تخصصه فكان بالتالي لازم إن يعرض في لجنة آداب المهنة، وتعرض أمام كل تخصص من الجامعة خاص بكل مرض اتكلم فيه، والحييثيات كانت إنه بيشتغل في غير تخصصه وإنه أدى إلى مشاكل ببعض المرضى، وفي شكاوى من المرضى إنه منع بعض الأدوية عن مريضة أدت إلى وفاتها».
خرافات التدخين ومنع شرب المياه
وقال عضو مجلس نقابة الأطباء، إن النظريات التي كان يروجها الراحل تجاوزت كل الخطوط الحمراء للعلم والمنطق، معقبا: «ابتدت الأمور كلها تظهر للنور بعد ما المشاكل دي ظهرت، والموضوع فعلا غريب جدا وابتدينا بنشكك في ثوابت حتى في الأكل ناكل وما نشربش إيه، هل من الطبيعي إننا نقول لواحد ما تشربش ميه؟ ويقولك السجائر مش مضرة والتدخين مش مضر شيء عجيب يعني، إزاي بنقول للسجائر طبيعية وعادية وده علبة السجائر نفسها مكتوب عليها إن هي تسبب الوفاة، مفيش حد بيجيب طب وهو قاعد في البيت».
ملاحقة قانونية لمن يسير على نفس الخطى
وأشار الدكتور شادي صفوت، إلى أن النقابة لن تسمح بظهور نماذج أخرى تهدد حياة المصريين تحت مسمى الطب، مؤكدا: «أي حد هيعمل نفس الأمور خارج سياق الطب هيتجاب وهيتحقق معاه وهيعرض على لجنة آداب المهنة ومن ثم إلى الهيئة العليا للتأديب، وإحنا في حالة إننا هنشوف أي حد هيخالف القواعد لا لازم هيتجاب، لأننا كأطباء دايما بنحث الأطباء إنهم يتمسكوا بالطب وماحدش ينساق ورا أي كلام خزعبلي ليس له أي صلة بالصحة من قريب أو بعيد وطبعا دوركم كإعلام موضوع أمن قومي».
لائحة جديدة لضبط الظهور الإعلامي للأطباء
وأضاف صفوت، أن هناك تنسيقا عالي المستوى لضبط المشهد الإعلامي الطبي، لافتا إلى ترحيبه بقرارات المجلس الأعلى للإعلام، قائلا: «الموضوع كان بينظم ظهور الأطباء بمعنى إن مفيش حد دكتور يطلع يقولك أنا خبير أنا الأفضل أنا الأحسن أو شكل الإعلان اللي هو في بعض السوشيال ميديا ساعات بتبرز بعض الحاجات الغير لائقة، الطب ده طب حقيقي مش ماتش كورة ناس تطلع تفتي وتتكلم فيه، الموضوع مش هيصة في قانون وفي احترام وفي دولة وفي حياة ناس، واللي مش عارف يجيب حد متخصص يسأل يبقى موجود معاه مش عيب».
