هند الضاوي: مناورات الجيش المصري لم تكن قريبة من إسرائيل

علقت الإعلامية هند الضاوي على الفيديو المتداول عبر وسائل إعلام عبرية وبعض المنصات الإقليمية والدولية، قيام الجيش المصري مناورات بالذخيرة الحية قرب الحدود مع إسرائيل على مسافة 100 متر، مؤكدة أن ما يتم تداوله هو رواية إسرائيلية، يفتقر إلى أي مصدر رسمي موثوق.

لا يوجد مصدر رسمي

وقالت هند الضاوي، خلال حلقة اليوم الأربعاء من برنامج “حديث القاهرة”: ده فيديو نشرته وسائل الإعلام العبرية واتنقلته منصات كتير، وبيتقال فيه إن الجيش المصري بيعمل مناورات بالذخيرة الحية على حدود إسرائيل وعلى مسافة قريبة جدا من المستوطنات، وده طبعا تم تقديمه على إنه تصعيد كبير وخرق لاتفاقية السلام، وكمان قالوا إنه مسبب حالة رعب عند المستوطنين.

وأضافت: للأسف أنا رصدت إن ناس كتير سواء في مصر أو بره بيتعاملوا مع الكلام ده كأنه حصل فعلا، رغم إنه مجرد رواية إسرائيلية مفيش أي مصدر رسمي مصري أكدها، تابعت: الحقيقة إن في مناورات حصلت فعلا، لكن كانت في منطقة تانية خالص بعيدة تماما عن الحدود، وحضرها وزير الدفاع ورئيس الأركان.

وتابعت: إحنا دايما عندنا قاعدة مهمة جدا، أي حاجة تخص القوات المسلحة المصرية لازم ناخدها من المتحدث العسكري بس. اللي بيتنشر ده ممكن يكون مفبرك أو جزء من حرب نفسية، وكون وسائل إعلام دولية نقلته عن الإعلام العبري ما يديش له مصداقية.

إسرائيل أحيانا بتعمل جس نبض

وأشارت إلى أبعاد سياسية محتملة وراء تداول مثل هذه الأخبار، قائلة: إسرائيل أحيانا بتستخدم الحاجات دي كنوع من جس النبض أو بالونات اختبار، بتشوف ردود الفعل وبتسوقها خصوصا للولايات المتحدة، عشان تبان إنها تحت تهديد وإنها محتاجة دعم أو قرارات معينة.

واستكملت: مصر لما بتعمل مناورات بتعلن عنها بشكل واضح ورسمي، ومفيش حاجة اسمها بتتحرك في الخفاء بالشكل ده. اللي بيحصل ده محاولة لخلق رواية وإحنا للأسف بنساعد في نشرها من غير ما نتأكد.

وشددت على ضرورة تحري الدقة، مضيفة: اللي حصل قبل كده في 2011 كان درس مهم جدا، لما صدقنا روايات جاية من بره واتضح إنها غير صحيحة وسببت فوضى. لازم نتعلم من ده وما نكررش نفس الخطأ.

وأكدت: مصر دولة مؤسسات، وأي موقف أو تحرك بيتم الإعلان عنه بشكل رسمي، فمهم جدا إننا نرجع دايما للمصادر الموثوقة وما ننساقش وراء شائعات أو روايات غير مؤكدة، خصوصا في ظل الأوضاع الحساسة اللي بتمر بيها المنطقة.