إلهام وجدي تكشف كواليس دورها مع ياسمين عبدالعزيز في «وتقابل حبيب»
كشفت الفنانة إلهام وجدي، عن كواليس تعاونها مع النجمة ياسمين عبدالعزيز في مسلسل وتقابل حبيب، المشارك في السباق الرمضاني لهذا العام، مشيرة إلى أنها رفضت الدور في بداية الأمر.
وأضافت خلال استضافتها في برنامج «الستات ميعرفوش يكدبوا» المذاع عبر شاشة سي بي سي: «في البداية رفضت الدور علشان صعب جدا وشرير وأنا عمري ما عملت دور شر في حياتي ومستحيل أخاطر مع ياسمين عبدالعزيز وجمهورها».
وأردفت: «والكاتب عمرو محمود يس كلمني ووضحتله رأيي وخوفي من المشهد، وبعدين قررنا إن محدش هيعرف إني شريرة غير يوم ما تسلمها ومينفعش حد يشك فيكي أبدا».
حروب خارجية
وواصلت: «حتى في أخر مشهد ياسمين عبدالعزيز قالتلي أنا مش هدعي عليكي بجد علشان دعوتي مستجابة وخلي بالك جمهوري بيحبني جدا، وفعلا قعدت سنة كل الناس في الشارع بتقولي منك لله، ياسمين أصلا في بينها وبين ربنا عمار ومهما يحصل حروب خارجية كل حاجة بتتقلب وبتكون معاها».
قالت الفنانة إلهام وجدي: «أنا سعيدة جدا بمشاركتي في مسلسل حكاية نرجس، وكان دور زينب في المسلسل تحدي كبير ليا، وأنا في حياتي عامة شخصية بتعشق التحدي».
وأضافت، خلال استضافتها في برنامج «الستات ميعرفوش يكدبوا المذاع عبر شاشة سي بي سي: «أنا شخصية بتحب التحدي من صغري لدرجة إن أهلي لما بيكونوا عايزين مني أنفذ حاجه صعبة بيقولولي لا مش هتقدري ولا هتعرفي».
وتابعت: «كنا بنقول إزاي فريق العمل كده كله بيحب بعض والكواليس كلها كانت ممتعة، وحقيقي كلهم كانوا بيشجعوني جدا جدا وكمان أحمد عزمي الأستاذ كان بيقولي أنا سعيد بشغلك وكمان حمزة العيلي وريهام عبدالغفور ده شيئ أسعدني جدا».
وواصلت: «دوري كان مختلف وأول ما شوفت اللي عامل دور ابني قولتله ماما مين انت متقوليش ماما دي أبدا».
التحضير للشخصية
وفي سياق حديثها عن تحضريها للشخصية، أكدت أنها استمدت الإلهام في هذه الشخصية من سيدة كانت تعمل لديهم في المنزل عندما كانت صغيرة، مضيفة: «كان عندنا ست أول ما بتدخل بتحط كحلة كده قديمة، أنا أول ما كنت هقدم الدور ده قولتلهم عايزة المكحلة دي ومش حقيقي كلام الناس إن السيدات من الطبقة دي مش بتحط مكياج خالص»
وعن أولى أعمالها، كشفت إلهام وجدي عن أول فيلم قصير في حياتها وهو فيلم توك توك، قالت: «الفليم ده أخد 42 جائزة دولية وأنا أخدت 8 جوائز دولية كأفضل ممثلة».
