شيرين عبدالوهاب: بحضر أغنية مع حماقي هتعجبكوا جدا ودمها خفيف

قال الإعلامي عمرو أديب، للفنانة شيرين عبدالوهاب خلال مداخلة هاتفية: "اعتبريني صحفي صغير وقوليلي إيه الجديد عندك، وكلمه منك هتفرق لإن الغنى نفسه فيكي ومستنيكي ولازم تعرفي قيمتك إنت مش عايشة لنفسك واللي عملتيه مش كفايه.

وردت النجمة شيرين عبدالوهاب: كل أسبوع هيكون فيه أغنية لحد ما الصيف يخلص، متابعة: الساحة الفنية حاليا  فيه ناس بتقدم حاجات مهمه جدا بس الـAI أثر بشكل كبير.

وتابعت الفنانة شيرين: عندي مفاجآت كتير وعايزة أقول لكل الناس متشكرة أوي وحشتوني، ونفسي أعمل حفلة كبيرة أوي في مصر ودي هتكون أول حفلة ليا، مواصلة: انا بحضر أغنية مع حماقي هتعجبكوا جدا دمها خفيف بتوقيع عزيز الشافعي.

وتحدثت الفنانة شيرين عبدالوهاب، عن الناس التي وقفت بجانبها خلال الفترة السابقة، قائلة: محمود الليثي فرشلي شقة ووقف جنبي وقفته مش هنساها، وأحمد سعد صاحب عمري وأخويا اللي أمي مجابتهوش.

هيفاء وهبي نسمة وقلبها طيب

وأضافت أن هيفاء وهبي نسمة وقلبها طيب وكلمتني مرة وحسيت فيها إنها مش بس بتطمن عليا ولكن عايزة تقف جنبي، وتابعت: زينة أيضا مسابتنيش خالص بالعكس قامت باكبر حدث في حياتي وإنها كانت بترعي ولادي في غيابي.

وقال الإعلامي عمرو أديب، إن مصر هي قلب الإنتاج ونور الغناء والتلحين والتأليف والتمثيل والقوة الناعمة المصرية لا جدال عليها كل يوم عندنا إبداع وأغاني جديدة وأفلام ومسرحيات ونحتفل بيها دائما لكن هناك أشياء يجب التوقف عندها.

عمرو أديب: أنا سعيد عودة شيرين

وأضاف “أديب” خلال حلقة اليوم من برنامج الحكاية: الانتاجات اليومية عظيمة، لكن عندما تعود شيرين للغناء هنا يجب أن تتوقف وتفكر وتبحث عن شيرين.. قلبي سعيد بعودتها ويجب الحفاظ عليها.

وفي مداخلة لشيرين عبدالوهاب مع الإعلامي عمرو أديب: قال أديب: أنا بعزك يا شيرين وشكرا على كل حاجة.. أنا بحبك انتي فين يا شيرين.. وقالت شيرين عبدالوهاب: أنا عندي جمهور ربنا يخليه ليا أنا مش خايفة ومش قلقانة، وتابع أديب: انت في حضن مصر يا شيرين الناس بتستناكي.