هتتخني طن ونص.. ياسمين عز: مين وهمك وقالك إنك هتخسي بعد الجواز

علقت الإعلامية ياسمين عز على ماتقوم به الفتيات قبل الزواج من شراء ملابس أصغر من حجمهم، قائلة: « عندي سؤال مؤرقني هو انتي ليه وانتي رايحة تتجوزي بتجيبي لبس أصغر من مقاسك مين وهمك وقالك إنك هتخسي لا سمح الله بعد الجواز». 

وأضافت ياسمين عز، خلال برنامج «كلام الناس» المذاع على قناة إم بي سي مصر، « يعني لو انتي مثلا إكس لارج بتجيبي لارج هل انتي على علم إنك بعد الجواز هتتخني 8 كيلو وبعد الحمل هتبقي طن ونص وهتفطري 4 مرات وهتتغدي مرتين وتتعشي 3 مرات». 

وتابعت: « وهل عريسك على علم إنك لما كنتي أنسه كنتي بتاكلي أخواتك الصغار في البيت وبتاكلي حلاوة وقشطة حاف الساعة 3 الفجر وقعدتك لوحدك مع التلاجة بقيتي طماعه ولازم تشتري لبس عادي أكبر من مقاسك بدرجة أو درجتين أيهما أقرب قبل الجواز لأنه هي مش فلوس على الأرض». 

بدل الأكياس خزني مشاعر لجوزك

وفي سياق آخر، علقت الإعلامية ياسمين عز على فكرة الإكتناز القهري الذي تقوم به بعض السيدات داخل منازلهم، قائلة: «عندي سؤال ليه أي حاجة بتدخل بيتكم مش بتطلع، إي كل الكراكيب دي علب النسكافيه القديمة محتفظة بيهم ليه وكوبايات الجبنه بتاعة بريزيدن ولافشكري بتتغسل وبتشربي فيها شاي ليه بتشربي ليه في برطمان وانتي عندك النيش مليان كوبايات مدهبة». 

وأضافت ياسمين عز، خلال برنامج «كلام الناس» المذاع على قناة إم بي سي مصر، « وبتحطي في برطمان الجبنه عصير للضيوف ليه هما الضيوف عملولك حاجه وحشة ولا اي، ودرج الأكياس واخد حيز من حياتكم ليه، ده بيإذي الطبيعة يا حبيبتي وبيعمل كركبة في المطبخ». 

وتابعت: « الأولى لو عايزة تخزني خزني شوية مشاعر لجوزك الغلبان وتحت المرتبة المفروض يبقى فاضي عشان الطاقة تطلع عليكي بالليل وانتي نايمه وتحلمي أحلام سعيدة وليه نحط تحت المرتبة أوراق وكراكيب وعقود قديمة». 

وعلى صعيد آخر، قالت الإعلامية ياسمين عز، إن التوقيت الصيفي ابتدا فدلوقتي عندك ساعة زيادة هدية تلبسي فيها لجوزك خلخال وتدلعيه. 

وأضافت، خلال برنامج «كلام الناس» المذاع على قناة إم بي سي مصر، «لو عايزة تهبلي جوزك البسي خلخال وشخللي بيه في الشقة قلبه هيتشخلل شخاليل».