"بديها 180 ألف كل خمس شهور".. مسلم يرد على طليقته بإثبات إنفاقه على نجله
خرج المطرب مسلم ليثبت صحة إنفاقه على نجله من طليقته الأولى، وذلك بالدليل المادي، حيث نشر صورة شيك صرف يحتوي على 180 ألف جنيه، وذلك من خلال حسابه الرسمي على موقع تبادل الصور والفيديوهات إنستجرام.
مسلم يثبت إنفاقه على نجله
حيث علق مسلم عليه قائلًا: “دا أقل ورقة عندي في البيت 180 ألف جنيه، كل 5 شهور، وفي كتير من ده، وفي شهود بس هقول أيه حسبي الله ونعم الوكيل، ومش هتكلم تاني في الحوار ده أنا بس نزلت إثبات صغير”.
أزمة مسلم مع طليقته
في سياق متصل، قد حرص المطرب مسلم، على الظهور لجمهوره رغم أزمته الأخيرة مع طليقته ضحى، من خلال بث مباشر عبر حسابه الرسمي على موقع تبادل الصور والفيديوهات الشهير "إنستجرام".
وتجاهل مسلم، في بدايه اللايف أزمته مع طليقته موضحًا بأنه لا يريد الرد، وأن الجمهور يحاسبه فقط على أعماله الفنية دون التدخل في حياته الشخصية.
وأصر الجمهور على تكرار سؤاله حول أزمته مع طليقته، ليضطر مسلم التوضيح لهم قائلًا: "أنا مركز في شغلي ومش مركز مع حد".
وأضاف مسلم، قائلًا: "لازم الناس تستغرب من اللي بيحصل معايا، أنا بتحارب، لو جبنا واحد مش عاقل هيعرف أن اللي بيحصل معايا ده مش طبيعي، ماهو مش معقول الناس كلها ملائكة وأنا اللي شيطان، ومستغرب ليه كل دا حصل بعد عيد ميلادي".
وواصل مسلم، قائلًا: "في ناس عامله نفسها عيلتي وأنهم مني ومحدش ليه دعوه بيا أصلًا، كلكم أسوأ من بعض، ولو طلعت اللي معايا محدش هيبص في وشها بس أنا عامل حساب لابني وهي كدا كدا كسفته باللي بتعمله".
واختتم مسلم، قائلًا: "بدفع لها 200 ألف جنيه كل 5 أشهر، وعندي مستندات تثبت كلامي مع المحامي، وهرد بالقانون".
طليقة مسلم: باخد منه مبلغ تافه مايجيش تمن كوتشي
وكشفت ضحى عبده طليقة مسلم، معاناتها من تراكم الديون وعدم قدرتها على تلبية الاحتياجات الأساسية لابنها، مشيرة إلى رفض مسلم الصرف على ابنهما، وذلك خلال فيديو لها عبر حسابها على إنستجرام.
وقالت طليقة مسلم : "عزلت 3 مرات بسبب إني مش معايا فلوس أدفع الإيجار، وقعدت سنتين بتحايل على مسلم عشان يصرف على ابنه".
وتابعت : "أنا مش بتاعة أذية بس إنه يميز حد عن حد دي صعبة على ابنه، وأنا باخد منه مبلغ تافه مايجيش تمن كوتشي من بتوعه، ولا الأماكن اللي بيروحها".
وواصلت طليقة مسلم باكية : "ليه يخرج يقول إن ابنه بالنسباله ميت؟ عمله إيه؟، وابنه مايعرفوش إلا من خلال النت".
واختتمت ضحى طليقة مسلم، مؤكدة أنها لا تسعى للإساءة أو الانتقام، وأن مطلبها الوحيد بسيط، حيث قالت : "أنا مش عايزة حاجة غير إن يبعتلي مبلغ يساعدني في مصاريف ابني".
