عمرو أديب: مصر مفيهاش حد جعان ولا بينام من غير عشاء

قال الإعلامي عمرو أديب، إن فكرة إن الأسرة في مصر ممكن تعيش بـ8 أو 9 أو حتى 10 آلاف جنيه “كلام مش دقيق”، مؤكد إن الرقم الحقيقي للمعيشة لو اتقال “الناس مش هتصدقه”، وتابع: مصر مفيهاش حد جعان ولا بينام من غير عشاء.. قولي أي حاجة إلا إن يكون فيها حد جعان.

المصريين عايشين بطريقة مختلفة خالص

وأضاف أديب، برنامجه “الحكاية”، أن الواقع بيقول إن المصريين عايشين بطريقة مختلفة خالص عن الحسابات التقليدية، قائلاً: “لا تمانية ولا تسعة ولا عشرة.. طب الناس عايشة إزاي؟”.

وأشار إلى إن سر استمرار الحياة في مصر مش بس في الاقتصاد أو الدعم الحكومي، لكن في “وقفة الناس جنب بعض”، مؤكد إن في مصريين كتير بيساعدوا غيرهم، لدرجة إن في عائلات مصرية بتعول أسر سودانية لاجئة.

ست سودانية في مصر ومعاها 6 اولاد

وسرد موقف لإحدى السيدات السودانيات، اللي قالت إنها في مصر ومعاها 6 أولاد، قدرت تدخل 3 منهم المدارس، والباقي بيكملوا حياتهم بمساعدة “ولاد الحلال من المصريين”.

وأوضح أديب إن اللي بيحصل ده مش مجرد أرقام أو سياسات، لكنه “بركة ورحمة”، على حد وصفه، مضيفًا إن التكافل بين الناس هو السبب الحقيقي اللي مخلي البلد واقفة.

وأكد كمان إن فيه دور مهم للدولة من خلال الدعم، زي التموين وبرامج “تكافل وكرامة” و”حياة كريمة”، إلى جانب دور الجمعيات الخيرية، لكن شدد إن العامل الأساسي هو “رحمة الناس ببعض”، ًوقال: “مفيش حد في مصر بيتساب لوحده.. دي بلد الناس فيها سند لبعض”.