نجل عبدالوهاب: أبويا عيط مرتين.. الأولى وفاة والدته والثانية وفاة عبدالحليم

أعاد نجل موسيقار الأجيال محمد عبدالوهاب، الحديث عن واحدة من أصعب اللحظات في حياة والده، كاشفا تفاصيل مؤثرة عن رد فعله وقت وفاة العندليب عبد الحليم حافظ.

وقال نجل عبدالوهاب، خلال لقائه مع الإعلامية منى الشاذلي، على قناة “أون”، لحظة وفاة عبدالحليم كانت صدمة كبيرة جدا لـ عبد الوهاب، موضحا: “لما توفى، قال ابني مات.. ابني مات.. كان منهار ومش مصدق اللي حصل”.

مش مستوعب الصدمة

وأضاف: “أنا أول ما عرفت، جهفي بالي على طول حالة والدي هتبقى عاملة إزاي، فروحت له البيت، ولقيته قاعد في أوضته بيعيط وبيصرخ، ومش عارف يعمل إيه.. كان عايز يمسك التليفون ويتأكد من الخبر، مش مستوعب الصدمة”.

وتابع: “أنا في حياتي كلها شفت أبويا بيعيط مرتين بس.. مرة يوم وفاة والدته، ومرة يوم وفاة عبد الحليم حافظ.. غير كده عمره ما بكى على حد”.

وأشار إلى إن العلاقة الفنية بينهم كانت قوية ومستمرة، وقدموا سوا أعمال وألحان عظيمة وأفلام ناجحة، لكن العلاقة الإنسانية كانت الأهم والأعمق.

كواليس أغنية من غير ليه

وكشف أيضا كواليس أغنية “من غير ليه”، موضحا إن التسجيل الأساسي للأغنية كان موجود من السبعينيات، حيث كان عبدالوهاب بيسجل صوته ك”بروفات” علشان يحفظ اللحن للمطربين، لكن بعد وفاة عبد الحليم، تم استخدام التسجيلات دي لاحقا.

وقال: “التسجيل كان موجود في الأدراج، وبعد كده في أواخر الثمانينات، اتقال ليه ليه منستخدمش التسجيل ده؟ وكان في جزء ناقص، فغناه وهو عنده حوالي 86 سنة، واتجمعت الأغنية بالتكنولوجيا الحديثة وطلعت بالشكل اللي الناس سمعته”.

وأكد على عبقرية والده الفنية، وقدرته على توظيف التكنولوجيا رغم تقدمه في السن، لإخراج عمل فني متكامل ظل خالدا في ذاكرة الجمهور.