طارق النهري: «جعفر العمدة بداية جديدة».. ويشيد بـ محمد سامي

تحدث الفنان طارق النهري عن كواليس عودته الفنية، مؤكدا أن مشاركته في مسلسل جعفر العمدة كانت نقطة تحول وبداية جديدة في مشواره.

مكنتش متخيل إنه يبقى ظاهرة عربية

وقال النهري: “الرجعة كانت بجعفر العمدة.. ده كان أول حاجة”، موضحا أنه لم يكن يتوقع حجم النجاح الكبير الذي حققه العمل، مضيفا: “أنا رايح على أساس إن أنا هعمل دور كده نشوف الحالة إيه، مكنتش متخيل إنه يبقى ظاهرة عربية.”

أول لقاء جمعه بالمخرج محمد سامي

وكشف خلال لقائه مع الاعلامي تامر عبدالمنعم، ببرنامج “أخر النهار”، عن أول لقاء جمعه بالمخرج محمد سامي، قائلا: “أول مرة في حياتي أشوفه.. ولما قعدت معاه خدني بالحضن وقال لي: كده خلاص هنشتغل مع بعض،”، مشيدا بقدراته الإخراجية: “هو زكي جدا وشاطر قوي في إنه يقود الممثل، وقدر يطلع مني شخصية حمدي فتح الله بشكل مضبوط.”

محمد نجح إنه يطلع الخوف اللي جوايا

وأضاف: “كان بيقولي خلي بالك الكاميرا عليك لوحدك عشان تاخد رياكشناتك.. وفعلا طلع كلامه صح”، مؤكدا أن المسلسل ساهم في استعادة ثقته بنفسه بعد فترة من التردد: “محمد نجح إنه يطلع الخوف اللي جوايا، وبدأت أتأقلم.”
وأشار النهري إلى أن النجاح الحقيقي للمسلسل ظهر بعد عرضه، قائلا: “أنا لغاية النهارده بيتنادى لي حمدي فتح الله… وجعفر العمدة ما كانش مجرد مسلسل نجح، أنا سميته حالة فنية.”

وروى موقفا يعكس مدى تأثير العمل، قائلا: “كنت في المنوفية، وكان في جنازة، وحد قال نستنى لما تخلص حلقة جعفر العمدة وبعدين نطلع على الجنازة”، وتابع: “ما أعتقدش إن الحالة دي حصلت من سنين طويلة، يمكن من أيام رأفت الهجان وليالي الحلمية.”

وعن أسباب النجاح، أوضح: “محمد رمضان شعبيته كبيرة، لكن في جعفر العمدة العمل دخل في تفاصيل الشارع، ومحمد سامي نجح يحط الشخصيات بشكلها الحقيقي، فكل واحد شاف نفسه في القصة.”
وقال: “الصراع الدرامي كان قوي، ووصل لكل الوطن العربي… بجد شابوه لمحمد سامي في الموضوع.”