فريدة عبيد تناشد الجهات المسئولة: "بتعرض للابتزاز الإلكتروني من منتج شهير"
ناشدت المطربة فريدة عبيد الجهات المسئولة لتنقذها بعد تعرضها للابتزاز الإلكتروني من منتج شهير، وذلك من خلال مقطع فيديو عبر حساب شقيقتها على منصة التيك توك.
فريدة عبيد تناشد الجهات المسئولة
وقالت فريدة عبيد في الفيديو: “عايزة أي حد يشوف الفيديو ده يناشد السلطات المسئولة أو أي جهة حكومية تقدر تساعدني وتنقذني من اللي أنا فيه، أنا بتعرض للأبتزاز الإلكتروني، في منتج وواحد بتاع سوشيال ميديا اشتغلت معاهم من حوالي 5 شهور، بيبتزوني، استولوا على حساباتي على كل السوشيال ميديا، بيحاولوا يهكروا حساباتي في البنوك، هكروا تليفوناتي وتليفونات عيلتي كلها، عشان يوصلوا لتليفوني، مهكرين أكونت أنغامي، وعلى آبل ميوزك، وبيسحبوا الربح من حوالي كام شهر وأنا مكنتش مكتشفة، ولما صحيت من النوم لاقيت أكونت أنغامي متغير صورته ومتغير اسمه، وكلمت بتاع السوشيال ميديا اسأله لأني لاقيت الأغاني بتاعت المنتج ده محطوطة على الأكونت، لأن ده أكونت خاص بينزل عليه الأغاني بتاعتي اللي من إنتاجي بس، قالي جربي وأنا معاكي وأداريه وقتها استولى عليه وأنا مخدتش بالي، واقنعني أنه شغال تمام، اتملك من تليفوني ومن تليفونات عيلتي كلها".
“عايزني اشتغل شغل مش مناسبني”
واستكملت فريدة عبيد حديثها قائلة: "أنا معملتش للناس دي حاجة غير أني قولت لا مش عايزة اشتغل شغل مش مناسبني، عايزني اشتغل معاهم بالعافية فبيضغطوا عليا، أنا محتاجة أي حد من السلطات المسئولة يساعدني أنا طول الوقت بقدم شغلي من سكات، لا عمري بتكلم ولا بطلع اقول حاجة عن حياتي، الناس دي عايزة تقضي عليا، بقالي اسبوع بلف حوالين نفسي أنا وعيلتي كلها، لمجرد أني إنسانة محترمة عايزة اقدم فن محترم مش حاجة مبتذلة، ليا رأي وليا شخصية وهما عايزين يفرضوا عليا سيطرتهم، جبنا موبايلات جديدة بخطوط جديدة وبردو بيهكروها تتحول في إيدينا لحتة حديدة”.
فريدة عبيد توجه رسالة للمتنمرين عليها
في سياق منفصل، قد وجهت المطربة فريدة عبيد رسالة للمتنمرين عليها بعد ظهورها مؤخرا في برنامج هي وبس مع الإعلامية رضوى الشربيني، وكتبت فريدة عبيد عبر حسابها بموقع التواصل الإجتماعي فيسبوك: كل اللي بيتكلم ويتنمر علي شكلي مريض بجد . وعايزة اعرفكوا معلومة صغيرة أنا في البرنامج ده علشان موهبتي واغنيتي اللي كتبتها ولحنتها وغنتها ونجحت والناس حبتها مش علشان أنا بنت شكلها حلو".
وأضافت فريدة عبيد: "وعلشان اريحكو اعتبروني مطربة شكلها وحش بس صوتها حلو لو انتو مش مستوعبين انه كاميرا الموبايل مش بتجيب الشكل مظبوط زي كاميرا التليفزيون والإضاءة والميكب واللبس والشعر كل ده بيعمل تغيير في الشكل يبقي دي حاجة ترجعلكو او تقريبا انتو ما بقيتوش قابلين تشوفو ناس طبيعية وبسيطة مش متكلفة في ظهورها".
