تامر أمين يهاجم مبادرة تقليل المهر: مين يقدر يدفع مليون جنيه شبكة؟

علق الإعلامي تامر أمين على المبادرة اللي ظهرت في إحدى قرى الصعيد، واللي بتدعو لتقليل المهر والشبكة لتيسير الزواج على الشباب.

وأوضح تامر أمين، خلال حلقة اليوم من برنامج «آخر النهار» المذاع عبر شاشة النهار: "كان عندهم معايير لأولاد الزواج إنهم لازم يجيبوا شبكة بتوصل لـ350 جرام دهب، فقرروا يعملوا مبادرة لتيسير الزواج على الشباب".

تامر أمين ينتقد مبادرة تيسير الزواج على الشباب

وأضاف:" بعيدا عن إن أنا شايف إن 150 جرام ذهب ده كتير جدا وده رأيي، وكل واحد حر في رأيه، جرام الذهب عدى 7000، ده أنا آخر مرة اشتريت كان ب 5000، يعني الشبكة بس بتخش ب950 ألف جنيه ولا مليون جنيه، عايز أعرف أنهي شاب يقدر يدفع مليون جنيه مهر ولسه معملناش حاجة ولا تشطيب ولا شقة".

وتابع:"ممكن في ناس يبقى الرقم ده كلام فاضي بيمسوا على بعضهم، ربنا يزيدهم، لكن المبادرة ربطت الرقم بشهادات البنت وتعليمها، مش فاهم هو ده إيه".

واستكمل تامر أمين: "إحنا ديننا بيقول إن المرأة تنكح لأربعة دينها ومالها وجمالها وحسبها، مش لتعليمها أو أهلها، تدين وأخلاق وعفاف البنت هو ثروتها وراس مالها، وأنا ضد ربط القيمة بالتعليم والشهادة".

وفي سياق متصل، تحدث الإعلامي تامر أمين عن قرار الحكومة بالعمل عن بعد بداية من غدا الأحد، قائلا إن كل الجهات الحكومية والموظفين سيعملون لكن من منزلهم، لأن الحكومة أكدت أن ذلك سيساهم في التوفير وترشيد استهلاك الطاقة.

توفير الطاقة والمحروقات

وأضاف، خلال تقديم برنامجه «آخر النهار»، المذاع عبر شاشة قناة النهار: «لما 50 مليون مصري مينزلوش الشارع بكرا، عربيات وأتوبيسات وميكروباصات مش هتستخدم بنزين، كل دا هيعمل وفرة في الطاقة والمحروقات».

ملايين الناس تستطيع العمل عن بعد

وتساءل: «أنا مش بصطاد في الميه الحلوة، بس أنا كنت وقت كورونا وبعد كورونا جربنا العمل اونلاين ولقيته لطيف، طبعا أنا مجربتوش، بس ملايين الناس يقدروا يعملوا شغلهم كامل وهما قاعدين في البيت معززين مكرمين أو على القهوة من غير أتوبيس المصلحة راح وأتوبيس المصلحة جه».