أسما شريف منير في عيد ميلادها: "آخر 3 سنين عدوا عليا بألم وانكسارات وخذلان"
احتفلت الإعلامية أسما شريف منير، بعيد ميلادها بطريقة مختلفة عن السنوات الماضية، عبر حسابها الرسمي على موقع تبادل الصور والفيديوهات الشهير "إنستجرام".
ونشرت أسما شريف منير، عدة صور لها، وعلقت عليها قائلة: "النهارده عيد ميلادي، وآخر سنة ليا في الثلاثينات، و دي صور انهارده مافيش بهرجه، زمان كان عيد ميلادي ده احتفال مش عادي، أهلي كانوا بيحجزوا أماكن ويجيبوا magician وDJ ويبعتوا دعوات لـ مية حد، وعمري ما كنت بشوف عيد ميلادي يوم عادي أو حاجة صغيرة، بالعكس كان دايمًا يوم كبير جدًا بالنسبالي، وكنت بعد الأيام من أول مارس لحد ما ييجي"
وتابعت أسما شريف منير، قائلة: "بس آخر 3 سنين عدوا عليا بألم كتير وخيبات أمل وانكسارات وخذلان، وشوية شوية بطلت اهتم بعيد ميلادي، بطلت أخطط، بطلت أعد، بطلت أستنى، لأني كنت مشغولة أحاول أنقذ نفسي وأتعالج وأقوم وأشتغل على الـ anxious attachment بتاعتي وأرمم قلبي من وجع ناس أذوني ومحولوش عشاني وسابوني ، وده أخد مني كتير أوي عشان أكون أحسن وحقيقي اتعافي".
وأضافت أسما شريف منير، قائلة: "ومن السنة اللي فاتت بدأت رحلتي الروحانية مع ربنا، ولقيت فيها حاجات كتير ولسه بدور ولسه بتعلم ولسه باكتشف، بس السنة دي جزء كبير مني مش عايز عيد ميلاد شكلو حلو من بره بس مش حقيقي، أنا عايزة دعاء من القلب".
وأكملت أسما شريف منير، قائلة: "مابقتش عايزه أتمنى واتطفي شمعة وأمنية سطحيه و أقلب، بقيت أطلب من ربنا بشكل واضح اللي أنا حقيقي بتمناه، وعندي إحساس إن السنة دي هتكون سنة تحوّل حقيقي، سنة تطهير كبير ومعتقدات جديدة وبداية جديدة".
وأردفت أسما شريف منير، قائلة: "اللي بتمناه دلوقتي بسيط، إني أحس بالهدوء، وإني أحس إني محبوبة ومقدّرة وآمنة بجد، وإني أكون حواليّا ناس بتوعد إنها متمشيش، والناس دي موجودة في الصورة دي، الناس دي ما سابتنيش، وماخلتنيش أحس إني بشحت حب أو دعم، حبوني من غير أي طلبات أو مقابل".
أسما شريف منير: بتمنى يكون حواليا ناس مابتأذينيش
واستكملت أسما شريف منير، قائلة: "الناس دي وقفوا جنبي في أظلم أوقاتي وماحسسونيش أبدًا إني أقل من إني أتحب، جوزي وبنتي ربنا يبارك فيهم، الإتنين دول بيتي، الإتنين دول صدقوا فيا وحبوني وأنا في أصعب أوقاتي، ومن غير ما أطلب، وبالحب ده رمموا جزء جوايا ماكنتش متخيلة إنه ممكن يتصلح، وشالوا عني إحساس الهجر وإحساس إني مش كفاية وإني مش مستاهلة محاوله، ومش قادرة أوصف الامتنان ده بكلام".
وأردفت أسما شريف منير، قائلة: "السنة دي أنا بطلب من كل حد يقرأ الكلام ده إنه يدعيلي، إن ربنا يباركلي في الرحلة الجاية، وإن حياتي تتحول، وإن قلبي يرتاح، وإن الـ anxiety تمشي، وإني أقرب لربنا، وإن ربنا يرزقني الجنة، اللي بتمناه دلوقتي مش كتير، بس أكون حوالي ناس مابتأذينيش، مابتسيبنيش، وما بتحسسنيش إني أقل".
واختتمت أسما شريف منير، قائلة: "السنة دي أنا عايزة ناس صح، وعايزة بدايات جديدة، وعايزة أستثمر في آخرتي، وعايزة أبقى أحسن نسخة من نفسي، أحسن زوجة، أحسن أم، أحسن صاحبة، وأي حد مش قادر يدي ده أو ممكن يأذيني أو يحسسني إني أقل، يارب أبعده عني ومايرجعش تاني من كل قلبي، كل سنة وأنا مطمنة ، اللهم آمين".
