بينفع وبيستنفع.. أحمد عبدالله محمود يكشف عن رأيه في "علي كلاي" ومسابقات العوضي
كشف الفنان أحمد عبدالله محمود عن رأيه في مسلسل علي كلاي شارك به في السباق الرمضاني الماضي وحقق نجاحا كبيرا للغاية ولاقى إعجاب وتفاعل الجمهور .
كما كشف أيضا عن رأيه في المسابقات التي يقوم بها النجم أحمد العوضي ، مشيراً إلى الجمهور يعتبر العوضي بطلا شعبيا .
وقال أحمد عبدالله محمود في تصريحاته لنيوز رووم : نوعية علي كلاي هي اللي بتسمع في الشارع وهي اللي بتعمل نسب المشاهدة العالية
وتابع : يعني مثلا العوضي عايز الناس تتفرج علشان يعمل المسابقة بتاعته والناس بقت تتفرج على مسلسلات العوضي علشان تكسب وفي نفس الوقت شايفين إن العوضي شبههم جدع ورجولة وواحد منهم وده اللي بيلمس الجمهور وبيلمسنا وحابين كده جدا .
واختتم : إيه المشكلة من المسابقات طالما عنده القابلية انه يعمل كده .. بالعكس هو بينفع وبيستنفع بالإضافة إن اللايفات اللي بيعملها بالساعات بينتج عنها مشاهدات عالية جدا وهو ناجح في النقطة دي .
وفي سياق متصل كشف الفنان أحمد عبدالله محمود عن تفاصيل أول لقاء جمع بينه وبين النجم أحمد العوضي منذ عدة سنوات ، مشيرا إلى أنه تنبأ بمستقبل كبير جدا للعوضي .
أول لقاء بين أحمد العوضي وأحمد عبدالله محمود
وقال أحمد عبدالله محمود خلال ندوته في نيوز رووم : أول مقابلة بيني وبين أحمد العوضي كنت وقتها بصور فيلم حديد مع عمرو سعد وهو كان بيصور السبع وصايا أو العهد وكان ساعتها اللبس غريب وكنا في اليوم ده بنتعشى في مكان وشوفته معدي من قدامي قولتله انت شاطر وهتبقى حاجة كويسة والعوضي رد عليا وقالي وأنا بحبك جدا .
وأضاف : بعدها عملنا مع بعض مسلسل اللي مالوش كبير وعجبوا جدا شخصيتي في المسلسل ومن هنا بقى بدأنا نشتغل كتير مع بعض كتير ونجحنا الحمدلله في أكتر من عمل وبقى يقولي انت تميمة الحظ بالنسبالي بعد كده .
أحداث مسلسل علي كلاي
تدور أحداث مسلسل علي كلاي في إطار اجتماعي شعبي، لشخص يدعى علي الذي يجسد شخصيته الفنان أحمد العوضي، وهو ملاكم سابق، يعمل في تجارة السيارات، بالإضافة إلى إدارته دار أيتام، قبل أن تتشابك حياته مع صراعات متعددة تتعلق بالعمل والعلاقات العاطفية والاجتماعية.
أبطال مسلسل علي كلاي
ويشارك في مسلسل علي كلاي كل من أحمد العوضي، درة، يارا السكري، محمد ثروت، عصام السقا، انتصار، ريم سامي، وصفوة، محمود البزاوي، سارة بركة، رحمة محسن، طارق الدسوقي، بسام رجب، أحمد عبدالله محمود إلى جانب عدد من الوجوه الشابة، ما يضمن تجربة درامية متكاملة تشد المشاهدين من الحلقة الأولى حتى الأخيرة، العمل من تأليف محمود حمدان، إخراج محمد عبد السلام، إنتاج شركة سينرجي.
