باسم يوسف: تعظيم الانتصارات الإيرانية وهم قاتل.. و«الحرب رايحة لسكة وحشة»

حذر الإعلامي باسم يوسف، من ما وصفه بـ«العشم المبالغ فيه» في نتائج المواجهات بين إيران وأمريكا وإسرائيل، ومشيراً إلى أن الشعوب قد تكون الخاسر الأكبر، كما عبّر فيه عن مخاوفه من تصاعد الصراعات العسكرية في المنطقة.

وقال باسم يوسف، في منشور مطول عبر حسابه على فيسبوك: «أنا عارف إن البوست ده حيضايق ناس كتير، فأنا باعتذر مقدمًا، اعتبروه فضفضة، اعتبروه يأس، أي حاجة. بس أعتقد إن فيه ناس عندها نفس الإحساس وخايفة تتكلم، العشم حلو، حلو قوي. بيديك أمل، بيديك طاقة لكن العشم لما يزيد عن حده ممكن يقلب غم، ويا رب أكون غلطان».

أضاف باسم يوسف:« الواحد متابع إزاي الناس بتعظم الانتصارات العسكرية لإيران أو لمقاتلي الحزب، وأنا متفهم ده جدًا الصمود وعدم الانكسار قدام أقوى إمبراطورية في التاريخ ده أكيد شيء ملهم جدًا، اللي أنا خايف منه نفس المشاهد اللي كنا بنحتفل بيها (ومن حقنا نحتفل طبعًا) لما حد في غزة يفجر دبابة من المسافة صفر، كانت فعلًا فيه بطولات ملهمة جبارة، لكن في الآخر، وللأسف، طال الوقت أو قصر، غزة اتسفلتت واتدمرت، ومات ما يقرب من 100 ألف، في مقابل خسائر تكون معدومة بالمقارنة على الجانب الآخر».

تعظيم الإنجازات الإيرانية

تابع باسم يوسف: «نفس فكرة احتفال الناس بقتل 6 أو 10 أو 12 واحد من الجيش الأمريكي قدام آلاف الإيرانيين، لأن للأسف جوانا إحنا شايفين الجندي الأمريكي أو الإسرائيلي قيمته بقيمة مئات إن لم يكن آلاف مننا، تعظيم الإنجازات الإيرانية مفهوم ونفسيًا مهم، لكن يا جماعة الحرب رايحة في سكة وحشة جدًا،  حتى لو أمريكا فقدت جنود في الغزو البري، حتى لو أسعار الطاقة ولعت، إحنا مش بنتعامل مع دولة (أمريكا) يهمها الناس بتوعها أو حتى أرواح جنودها، ولا حتى إن الأسعار تولع».

أوضح: «إحنا بنتعامل مع أفراد وشركات، الحرب دي مربحة جدًا ليهم حتى لو على حساب آلاف الجثث، وحتى لو كان منهم أمريكان، فيه رئيس بنقول عليه مجنون، بس مع كل تصريح بيهبد ويعلّي في البورصة، هو واللي حواليه بيكسبوا مليارات في المضاربة، انسوا فكرة إن دي دول أو حكومات ضد بعض، المواطن الإيراني والمواطن الأمريكي والمواطن العربي كلنا خسرانين وللأسف الحرب دي ماشية زي ما هم عايزين».

تابع:« إسقاط طيارة واحدة F-15 من 15 ألف طلعة جوية ده ولا حاجة، وأنا مش قصدي أكسر في مجاديف الناس إحنا شفنا غزو العراق والصحاف و"العلوج"، وفي الآخر رست على إيه؟.. شفنا اللي حصل في غزة ولبنان ودلوقتي في إيران، أنا خايف من العشم المبالغ فيه إننا نصحى يوم نلاقي نفسنا واخدين على قفانا للمرة المليون، ربنا يستر علينا إحنا عايشين مع ناس همج، ما عندهمش مانع يضربوا نووي وما حدش حيعمل لهم حاجة ويا رب أبقى غلطان».