سيد علي يهاجم قرار غلق المحلات: «تغيير لهوية مصر والقاهرة بقت مريضة»
انتقد الإعلامي سيد علي، القرار الأخير الخاص بإغلاق المحال التجارية في تمام الساعة الـ9 مساء، معتبرا أن هذا التوجه لا يمثل مجرد إجراء للترشيد، بل هو تغيير لهوية مصر وطمس لمعالم القاهرة التي لا تنام.
القاهرة مريضة ومطفية
وفي برنامجه «حضرة المواطن» المذاع على شاشة «الحدث اليوم»، وصف سيد علي مشاهداته في شوارع وسط البلد والحسين بعد تطبيق القرار، قائلا: «أنا كنت مروح الساعة 9 ونص بالليل مش دي القاهرة.. لما تمشي في منطقة الحسين والغورية وباب الشعرية والسيدة زينب وتلاقيها الدنيا ظلمة ومطفية.. تشعر إن القاهرة مريضة، تشعر إن في حاجة واجعاك قوي».
ورفض علي المقارنات التي يسوقها البعض بالدول الأوروبية، معلقا: «في عباقرة يقولك ألمانيا وفرنسا وأمريكا بيقفلوا الساعة 6.. هؤلاء المتأمريكين اللي هم مش مننا واللي مش شبهنا أساسا آن الوقت إنهم يختفوا بقى من حياتنا لأنهم عرفونا.. البلد دي ليها هوية وليها شخصية وتحس إنها شبهنا».
السياحة هي نفط مصر
وحذر الإعلامي سيد علي من تأثير هذا القرار على قطاع السياحة، مؤكدا أن تميز مصر يكمن في حيويتها ليلا، متابعا: «أنا لو مسؤول هقول إن البلد دي هي دولة سياحية وأنا ممكن من السياحة الحقيقة تبقى هي النفط بتاعي.. السايح بيجي في بلد فيها الأمن والأمان فينزل يقعد في الحسين ويبقى هو ده اللي مش شايفه في بلاده».
وتابع: «واحد بيكلمني إمبارح خليجي صديق موجود هنا قالي سيد دي مش مصر.. قالي أنا مش عارف أروح فين.. كأن عندكم في حظر تجول».
بدائل للترشيد بعيدا عن الكآبة
وفي سياق متصل، طرح سيد علي حلولا بديلة لترشيد الاستهلاك بعيدا عن إغلاق المحلات، متبنيا مقترحا قديما بتعديل ساعات العمل الصباحية، قائلا: «ما تخلي مواعيد العمل الصيفية من الساعة 7 الصبح للساعة 1 والشتوية من الساعة 8 للساعة 2.. هتوفر حاجات قد كده ومش هتضطر تعمل التوقيت الصيفي».
وواصل: «إذا كانت حكومة الدكتور مصطفى مدبولي عايزة تعلم الناس وتقول لهم تناموا بدري يا حلوين وتستصحوا بدري ده قضية تانية.. انتوا بتجربوا في الناس؟ في حالة من الكآبة أساساً بسبب الحرب فانت بتعمل الصورة الضلمة».
كما أشار إلى الآثار الاجتماعية المترتبة على مكوث المواطنين في المنازل لفترات طويلة: «الناس بتتكلم على إن فيه طلاق هيحصل وإن في خلافات زوجية كثيرة جدا وإن النتيجة المباشرة اللي أنتوا بتعملوها.. الخلفة بعد 9 شهور، في الوقت اللي أنتوا بتطالبوا بتنظيم الأسرة».
