كريم سرور يطالب بحقه المادي في مشروع فني: المنتج قالي أنت فاكر نفسك في أمريكا
خرج الفنان كريم سرور عن صمته ليكشف عن مطالبته بحقه المادي في إحدى المشاريع الفنية، ورد المنتج استفزه بشكل كبير، وذلك من خلال منشور عبر حسابه الرسمي على موقع تبادل الصور والفيديوهات إنستجرام.
كريم سرور يكشف عن مطالبته بحقه المادي في إحدى المشاريع
وقال كريم سرور في منشوره: “كنت فى خناقة دلوقتى بطالب فيها بحقى المادى فى مشروع فنى ما وقلت فى النهاية انى هلجأ للقضاء واخد حقى بالقانون فالمنتج ضحك (بجد ضحك) وقاللى انت فاكر نفسك فى امريكا ، انزل للواقع خليك معانا هنا فى مصر، اقبل اللى هدهولك والا هتلف فى المحاكم ومش هتاخد حقك وقاللى انت فاكر ان هنا اللى بيعمل لواحد كدة ( وشاور بصباعه كأنها مطوة يعنى بيعمل جرح ) وراح يشتكى هيجروا يجيبوله حقه ، بعدها انا مردتش وفضلت شوية ساكت وفكرت هو ايه اللى يخلى راجل لمجرد انه معاه فلوس كتير يقول انى مقدرش اخد حقى بالقانون فى مصر وبيقولى فووووق القاضى مش هيعملك حاجة ، جاب الثقة دى منين ؟؟ هو احنا عايشين فين بالظبط !!”.
واستكمل كريم سرور منشوره قائلًا: “للحظة قلت هو انا ليه مصورتوش بس تراجعت وقلت اكيد مش هتبقى دى الطريقة الوحيدة اللى هاخد بيها حقى، انسحبت فى النهاية وقولتله خاينا نشوف ايه اللى هيحصل وانا عارف ازاى هاخد حقى، بس مازالت ملامحه وتعبيراته مستفزة جداً لدرجة انى بقالى اكتر من ٣ ساعات الاكل قدامى ومش قادر امد ايدى حتى عليه ومتنح وساكت ومش فاهم حاجة، حقيقى مش فاهم حاجة يعنى إيه !!!”.
حل أزمة التمثيل في مصر
في سياق آخر، قد خرج السيناريست كريم سرور عن صمته ليعلق على مستوى الكتابة في دراما رمضان 2026، وذلك من خلال منشور له عبر حسابه الرسمي على مقوع التواصل الإجتماعي فيسبوك.
حيث قال كريم سرور: “مشكلة التمثيل اتحلت الحمدلله ، قرب الناس من الصناعة حتى لو بشكل غير احترافى على التيك توك وصناعة الفيديوهات القصيرة والريلز خلت الناس تفهم وتحس بشكل أعلى وبقوا ينتقوا الموهوب بسهولة ويبروزه للجمهور كله وللصناع ، وخلت كمان مواهب كتير تستحق تاخد فرصتها فى وقت قياسى وتتصعد بسرعة كمان ، والسنين الجاية الموضوع هيبقى اعلى بكتير”.
أزمة الإخراج أصبحت في المتوسط
وعن الإخراج قال كريم سرور: “مشكلة الإخراج مسألة معقدة شوية ما بين مخرجين شاطرين مش عارفين ينفذوا اللى فى دماغهم بسبب فقر الإنتاج ( ومقصدش مادياً ) وبين مخرجين اصلاً ضعاف أوى وشغالين لأسباب إنتاجية وشللية برضه ، وفيه مخرجين تلاتة هما اللى عملوا شغلهم بإحترافية كبيرة ودقة بسبب خبرتهم أو موهبتهم فى الأساس ، وقبل كل ده إحترامهم للجمهور بجد وللفن ولنفسهم ، لكن المستوى فى المتوسط وأتمنى فريق الجامدين يرجعوا الموسم الجى تانى عشان فرق السرعات والقدرات تبان بسرعة بين الموسمين”.
