أول تعليق من تامر حسني بعد مشاركته في أحدث أغاني ماس محمد رحيم
علق الفنان تامر حسني على مشاركته المطربة ماس محمد رحيم في أحدث أغانيها التي تحمل عنوان “يروح البحر”، خاصة بعد طرحها بساعات وذلك من خلال منشور عبر حسابه الرسمي على موقع تبادل الصور والفيديوهات إنستجرام.
دعم تامر حسني
وقال تامر حسني معلقًا: “أنا شجعت ماس في أول أغنية تسجلها في حياتها، وشاركت بجملة بسيطة بصوتي، أدعموا أنتوا كمان بطريقتكم ماس حبيبة قلبي، بنت الموسيقار الراحل العالمي محمد رحيم بأغنية يروح البحر، ربنا يوفقك يا ماس يا حبيبتي”.
ماس محمد رحيم تحيي ذكرى رحيل والدها
في سياق منفصل، قد حرصت ماس ابنة الملحن الراحل محمد رحيم على إحياء ذكرى رحيله بكلمات مؤثرة لوالدها، مشيرة إلى أنها بعد وفاته فقدت روحها وشغفها في الحياة، كاشفة أيضًا عن بعض كواليس ذكرياتهم التي جمعتهما سويًا .
وكتبت ماس ابنة الراحل محمد رحيم عبر حسابها الرسمي على موقع التواصل الاجتماعي إنستجرام : فكرت كتير في الكلام اللي نفسي أقوله النهارده، واللي عارفاه كويس أوي إنه هيوصلك وهتحس بيا عشان اللي بيني وبينك مكانش وعمره ما هيكون في الأرض وانتهى عليها وبس، يمكن بقالي 3 شهور بحاول أجمع كلامي وبقالي سنه بحاول أصدق، أنا بقيت أدور عليك في تفاصيل عمري.
وأضافت: بدور على صوتك في كلامي وملامحك في مرايتي وفي وشوش إخواتي وأهلنا، كل ما بتوحشني يا بابا بتفرج عليهم وبشوفك فيهم كل كلامك يهمني، وأي حاجه كانت بتيجي في بالك ولو ثانيه كانت بتشغل تفكيري ويمكن عشان كدا أنا مش بنسى.
وأكملت: أنا كنت بشوف حركاتك وتعبيراتك ومش بعيوني وخلاص أنت ليك مكان خاص جوه قلبي، وكل ما أفتكر ذكراياتنا وأرجع للماضي، من كتر إحساسي بيك، بحس إن اللحظة لسه عايشه ولسه بنتمشى في الشارع وأنا بغني بصوت عالي، عشان أنا وهارتي نضحك ونتكسف وأنت تضحك على رد فعلنا، أنا فقدت روحي ونفسي وإحساسي وإدراكي وشغفي، لما أنت مشيت، ولكن كل مرة بفتكرك فيها واللهِ واللهِ بيرجعولي تاني، ولو حد عايزني في حاجة بجد يحلفني بعيونك.
واختتمت: ذكرى أليمة وبتوجعني وبتحطمني ولكن كفايه عندي إني بفتكرك أنت، ورب العالمين رزقني بيك وخلاني بنتك وخلى حبك في قلبي كبير كدا، عشان توحشني أوي، ادعو لـ قلبي بالرحمة والمغفرة.
