صانعة محتوى تشيد بتطوير الأهرامات.. ونجيب ساويرس: «شكرا للتقدير»
قالت صانعة محتوى مصرية إنها فوجئت بالتطور الكبير الذي شهدته منطقة أهرامات الجيزة خلال زيارتها الأخيرة، مشيرة إلى أن التجربة الحالية مختلفة تمامًا عن الماضي، وأن مستوى التنظيم والخدمات أصبح أكثر راحة وسلاسة للزوار.
وأضافت، في منشور لها على وسائل التواصل الاجتماعي: «روحت الأهرامات امبارح، وعاوزه أقول لكم بصراحة إن الأهرامات اتغيرت جداً جداً».
وتابعت: «طول عمري وأنا بروح الأهرامات ألاقي بس حصان وجمل ومليون باب للدخول، وعشان توصل للهرم نفسه لازم ركوب حصان أو جمل أو بتتعرض لاستغلال».
وواصلت حديثها: «بس امبارح، اتفاجئت بالتطور: الدخول بقي من باب واحد اسمه "البوابة العظمي»، مكتوب باللغه المصرية القديمة، أول ما قطعت التذكرة، جوه المنطقة، لاقينا باصات كهربائية مكيفة مجانية، وكل دقيقتين في باص».
وقالت: «الباص بيوديك أول محطة منطقة بانوراما فيها مطاعم وكده، وبعد ما تخلص، تلاقي باص كل دقيقتين بيوديك للهرم الكبير، بعده الصغير، بعده الوسط، وأخيراً أبو الهول».
وأضافت: «شكراً والله بجد على الباصات دي، لأول مرة مش حاسه بأي استغلال».
كما أشارت إلى وجود مرشدين سياحيين للمصريين، وقالت: «أول ما دخلنا، شرحولنا كل حاجة، وكانوا لطيفين جداً».
وعن أسعار ركوب الجمل والحنطور، قالت: «كان مكتوب إن الأجانب السعر 1000 جنيه، والمصريين 400 جنيه، الراجل خد مني 200 بس، وفعلاً استمتعنا».
وأكدت أنها لاحظت رضا السياح، موضحة: «السياح كانوا مبسوطين جداً بالتطور ده»
ولفتت بقولها: «اللي اكتشفناه إنه للأسف كل حاجة تحت إيد الحكومة بتبوظ، بس أول ما ساويرس استلم منطقة الأهرامات، كل حاجة اتغيرت».
وأشارت أيضاً إلى تحسين الأماكن المخصصة للبائعين: «الناس اللي بتبيع على الأرض، عملوا ليهم أماكن نظيفة وجميلة للبيع».
واختتمت منشورها: «محتاجين تروحوا الأهرامات تاني، بصراحة المكان اتغير جداً جداً. وبكرة هنزل لكم فيديو وانا هناك. وشكراً نجيب ساويرس والله».
من جانبه شارك ساويرس منشورها عبر حسابه الشخصي على منصة إكس، معبرا عن سعادته وشكره لتصريحاتها.
