زعلانة على نفسي والكيماوي بيهلكني.. هبة السيسي تكشف لأول مرة رحلتها مع السرطان

كشفت الفنانة وملكة جمال مصر السابقة هبة السيسي لأول مرة عن تجربتها مع مرض السرطان، مستعرضة التحديات التي واجهتها خلال العلاج الكيماوي، وموجهة رسائل لكل من ينتقد مظهرها أو يقلل من عزيمتها خلال هذه المرحلة الصعبة.

زعلانة على نفسي بس مش معترضة

ووصفت هبة السيسي خلال لقائها ببرنامج «قد التحدي» غبر شاشة «الشمس» مع الإعلامية لقاء سويدان، صراعها النفسي مع المرض قائلة: «أنا ما بعترضش بس أنا زعلانة على نفسي ليه بيحصل لي كده؟ أستغفر الله العظيم غصبا عني زعلانة على نفسي بس مش معترضة على قضاء ربنا هو امتحان وبقول يا ربي ده ابتلاء لتخفيف ذنوب ربنا بيخفف عني حاجات تانية بس بقعد مع نفسي ببقى زعلانة».

بين آلام الكيماوي وواجبات الأمومة

وحكت هبة: «أنا امبارح نزلت آكل برا وأنا في الشارع تعبت مقدرتش أتحرك من مكاني وخدوني ورحنا المستشفى أخذت مسكنات علشان أبقى كويسة عشان الألم الرهيب ده طول الوقت عندي عظمي كله بيوجعني بطني بتوجعني.. بس برضو بصحى الصبح كل يوم الساعة 6 عاملة اللانش بوكس أخد ولادي أوديهم المدرسة وبعد المدرسة بروح أجيبهم بعمل لهم غدا بغديهم وبوديهم للتمرين وبجيبهم للتمرين بعمل لهم كل حاجة مش مقصرة في حاجة الحمد لله يا رب».

رسالة للمنتقدين

ووجهت هبة لمنتقديها رسالة قائلة: «أنا بقول لهم يعني ما تستكثروش عليا إن أنتوا تشوفوني قوية في عز كل التعب والوجع ده إن أنا واقفة على رجلي بقاوم وبحارب أنا محاربة وأي حد عنده أي مرض من أي نوع ده شخص محارب».

واختتمت هبة السيسي حديثها بدعوة للرحمة والإنسانية في التعامل مع المرضى، قائلة: «الشخص اللي بيبقى تعبان وحاسس بألم ومش قادر إن هو يشتغل زي ناس كتير جدا بتنزل وبتشتغل علشان مش عايزة تستسلم تحية كبيرة ليكم أنتوا محاربين.. للناس بقى اللي بتحاول تقلل من قيمة الناس دي كونوا رؤوفاء وكونوا رحماء خلي عندكم قلب خلي عندكم مشاعر.. حسوا بالناس علشان ربنا يحس بيكوا علشان لما توقعوا تحسوا أو تلاقوا حد يوقف جنبكو».