سامح حسين: التنازلات اللانهائية والعطاء بلا حدود نهايتهما صدمة قوية

تحدث الفنان سامح حسين عن التنازلات اللانهائية والعطاء غير المحدود في المكان الخطأ والذي ينتج عنه صدمة قوية، قائلا: «أي حد بيمشي في سكة التنازلات اللانهائية والعطاء الغير محدود، نهاية طريقه صدمة قوية جدا، لأن بعد ما هتدي كل اللي عندك هتتقابل بحاجة من الاتنين يا الناس اللي انت ضحيت علشانهم يعترفوا بجميلك ويحاولوا هما كمان يردهولك وغالبا هيقدمولك أقل من اللي انت قدمته مش علشان هما بخلة، لأ عشان قدرات الناس في كل شيء متفاوتة».    

إحساس الظلم والحق المهضوم

وأضاف خلال تقديم برنامجه «قطايف»: «مش شرط الناس تقدر تردلك اللي انت عملته وهنا هتيجي صدمتك الأولى وهتزعل جدا وهتحس إنك اتظلمت وحقك اتهضم، أو الاحتمال التاني إن محدش يردلك حاجة أصلا وهيتقالك محدش طلب منك تعمل كل دا، ودي الجملة المتكررة في كل قصص التضحية الأفلاطونية».

بشويش على نفسك

وتسائل: «يبقى الحل اي؟، بشويش على نفسك، ولما تدي إدي بحساب ولما تتنازل اتنازل بحكمة ومتستناش الجزاء من الناس، اعمل الخير لله واستنى مكافأتك منه هو، وأنا عمري مشوفت أجمل من كلام سيدنا علي ابن أبي طالب في الموضوع دا لما قال: أحبب حبيبك هونا ما، عسى أن يكون بغيضك يوما ما، وأبغض بغيضك هونا ما، عسى أن يكون حبيبك يوما ما». 

في وقت سابق، قال الفنان سامح حسين، إن حياة الانسان بلا ثوابت ستتحول إلى مركب خشب ضعيفة جدا، يلعب بها موج الأمواج الشخصية، وكل شيء سيكون نسبيا "وكل شيء هتعمله لو عايز تعمله وهينفع متعملوش لو مش ميال إنك تعمله".

متغيرش من مبادئك

وضرب "حسين" مثال: لو مفيش قاعدة واضحة في حياتك بتقول إن إقامة علاقة مع ست متزوجة هو فعلا محرم ومجرم شرعا وقانونا وممنوع هتسيب الحكاية لهواك، يعني: لو الست دي مش عجباك يبقى ميصحش وعيب وده فعل غير أخلاقي، أما لو الست عجباك هتلاقي ألف مبرر.

وأضاف، خلال الحلقة الـ18 من برنامج “قطايف” أن من المبررات: هو الجواز علاقة تملك، أو ممكن تقول أصل بحيها وبتحبني وممكن تقول ليه الراجل يقدر يتجوز أكثر من الست وليس العكس، موضحا أن هذه الافتراضات ليست خيالية، فهي ليست من وحي الخيال، "كل الكلام ده في ناس قالوه بجد عشان يبرروا بيه أفعالهم.. كل  واحد بيشرب الشاي مظبوط بطريقته".