صابرين جابر لـ "نيوز رووم": الضغوط حواليك؟ اتعلم تعيش رغم كل شيء

ترتبط الصحة النفسية الجيدة بالقدرة على مواجهة ضغوط الحياة واتخاذ القرارات بشكل متوازن، كما تساعد الإنسان على العمل والإنتاج والتفاعل الإيجابي مع المجتمع، كما أن إهمال الصحة النفسية قد يؤدي إلى مشكلات مثل القلق أو الإصابة بـ الاكتئاب، الذي يؤثر في المزاج والطاقة والقدرة على ممارسة الأنشطة اليومية، وفي سياق متصل كشفت صابرين جابر خبيرة العلاقات الاسرية كيفية التعامل مع الضغوط رغم كل شيء.

وقالت صابرين جابر لـ "نيوز رووم": في أيامنا، ساعات بتحس إن الدنيا ضاغطة من كل ناحية: شغل، دراسة، ناس حوالينا، توقعات كبير حتى نفسك ساعات بتحس إنها مش قادرة تواكب كل ده طبيعي جدا تحس بالضغط أو القلق ومش معناه إنك ضعيفة بالعكس ده دليل إنك حاسة وبتهتمي.

السر مش إنك تحاول تشيل كل حاجة مرة واحدة السر إنك تعرف تعيش اللحظة اللي انت فيها حتي  لو مش كاملة أوقات قليلة من الراحة ضحكه طالعه من قلبك ابتسامه صغيرة لحظة بس مع نفسك أو حاجة بسيطة بتحبيها كل ده ممكن يخفف عنك عبء أكبر من أي نصايح كبيرة.

الضغط النفسي لما يتراكم من غير أي مخرج بيأثر على صحتنا الجسدية والنفسية لكن لو عرفنا ندي نفسنا فرصة نتنفس نضحك نهتم بحاجة بسيطة حوالينا الأمور بتتخفف وده مش ضعف ده ذكاء ووعي بنفسك، وده مهارة لازم نتعلمها.

في كل يوم مش لازم نكون كاملين مش  لازم نكون دايمًا منتجين أو مبسوطين 100%. المهم نعرف نسمع نفسنا نديها حقها في الراحةنعرف نطلب المساعدة لو محتاجينها ونتقبل إن مش كل حاجة هتمشي زي ما احنا عايزين.

المهم نركز على اللي نقدر نتحكم فيه: مثلا اللحظات الصغيرة اللي تفرحنا والأشياء اللي بتخلينا نحس بالسلام حتى وسط كل الضغوط.

نصايح نفسية للتعامل مع الضغط اليومي:

 

1. تنفس واعيش اللحظة: كل ما حسيت بالضغط خد نفس عميق وبص حواليك. اللحظة اللي انت فيها دلوقتي هي اللي عندك ومش كل المشاكل محتاجة حل على طول.

2. حدد أولوياتك: مش كل حاجة مهمة دلوقتي ركز على اللي تقدر تتحكم فيه، وسيب الباقي في وقته.
 

3. خد وقت لنفسك: ضغوط الحياه مش بتتوقف  لكن انت ممكن توقف لحظة مش لازم تكون متاح لكل الناس وكل حاجة طول الوقت.
 

4. شارك اللي جوه قلبك: الكلام مع شخص بتثق فيه عن اللي مضايقك بيخفف الحمل النفسي جدا  ده مش ضعف، ده قوة.
 

5. افرح باللحظات الصغيرة: ضحكة شاي دافي موسيقى بتحبها التفاصيل الصغيرة دي بتفرق جامد وبتديك طاقة تكمل اليوم.
 

6. اقبل مشاعرك: القلق أو التوتر مش عيب بس لازم تعرف تعيشهم من غير ما يخلوك توقف أو تحكم على نفسك بقسوة.

في النهاية

في النهاية مش كل يوم هيبقى سهل، ومش كل لحظة هتكون تحت السيطرة لكن كل يوم ليه فرصة جديدة فرصة نعيش فيها بطريقتنا نسمع نفسنا ونحمي قلبنا من الضغوط الزايده  الحياة مش محتاجة نكون كاملين بس محتاجة نعرف نكمل فيها ونضحك و نحب ونستمتع بكل لحظة صغيرة تخلينا نحس بالسلام والهدوء جوانا.

افتكري دايمًا: القدرة على العيش وسط الضغط مش ضعف، ده دليل قوة وسعادة قلبك مش محتاج ظروف مثالية بس انتي  محتاجة أنت تعرفي تعيشيها صح.