إبراهيم عيسى ساخرا: قلبي بيحتاج دعامة رابعة لما أسمع إن سقوط إيران يهدد مصر

قال الكاتب الكبير إبراهيم عيسى: «قلبي اللي عامل ثلاث دعامات ده لما بيسمع إن سقوط النظام الإيراني هيهدد أمن مصر بحس إن هو يحتاج دعامة رابعة كمان شوية».

وأضاف عيسى خلال فيديو نشره على صفحته الرسمية على موقع التواصل الاجتماعي فيسبوك: «أنا بحزن جدا إن الكلام ده يطلع من مثقفين أو مواطنين مصريين».

مصر دولة كبيرة قائمة بذاتها

وتابع إبراهيم عيسى: «مصر دولة كبيرة، عايز تختلف معاها ومع حكومتها تختلف براحتك، لكن بعقل مش بخسة، في النهاية دي مصر وهي القوة العسكرية الأولى عربيا، وهي اللي انتصرت على إسرائيل، وهي اللي أقامت سلام مع إسرائيل».

إسرائيل لن تتجرأ على مش شبر من الأراضي المصرية 

وواصل: «مصر من سنة 79 عاملة معاهدة سلام مع إسرائيل، وإسرائيل لحد النهارده لم تستطع أو تفكر حتى إنها تمس شبر أو متر أو ترابة واحدة من أرض مصر ومش هتتجرأ تعمل ده».

واختتم قائلا: «مصر مين ياض اللي هتتأذي لو إيران وقعت؟ ليه.. إيران هي اللي بتحمينا بروح والدك، إزاي يعني الكلام ده مش منطقي أصلا».

وفي وقت سابق، تحدث الكاتب والإعلامي إبراهيم عيسى عن الأحداث الأخيرة التي تدور حول الهجوم الإسرائيلي على إيران، قائلا: «وتقولي أصل النظام الإيراني كان يردع إسرائيل وشوف إسرائيل هتعمل اي في المنطقة مع غياب القوة الإيرانية، ما هذا العته؟، انتو عايشين في عالم غير عالمنا». 

200 طيارة تضرب 500 هدف

وأضاف: «النظام الإيراني عمل اي لنفسه؟، دا في أول 10 دقايق 200 طيارة تضرب 500 هدف أو صاروخ لكن لم تُخدش طائرة فيهم، وبيجيب أكبر راس فيكي يا بلد ويقتلها، المرشد نفسه، و40 قيادة، وتقولي قوة النظام الإيراني؟». 

ضرب القيادات في قلب طهران

وتابع الإعلامي الكبير إبراهيم عيسى: «الإسرائيليين قتلوا الرئيس الإيراني شخصيا في قلب إيران وطهران، إسرائيل ضربت العلماء الإيرانيين في الشارع، بينزلوا بالعربية يقتلوه بالرصاص ويمشو، في اختراق أكتر من إنهم قتلوا خامئني وصوروا مقتله وبعتوا الفيديو لترامب ونتنياهو، يعني بنتكلم على دولة على نظام مخترق تماما، نظام ضعيف هش أهبل ساذج تافة».