بعد أولى حلقاته.. حنان سليمان: "أنا مش حما شريرة في مسلسل اللون الأزرق" |حوار
لافتت الفنانة حنان سليمان أنظار الجميع في أولى حلقات مسلسل اللون الازرق، خاصة أنها تجسد شخصية حما شديدة إلي حد ما، وتحمل الشخصية جوانب كثيرة خفية، وأجرى موقع نيوز رووم حوارًا صحفيًا مع الفنانة القديرة حنان سليمان للكشف عن تفاصيل أكثر عن المسلسل.
وإليكم نص الحوار:
س: ظهرتِ في أولى حلقات مسلسل اللون الازرق كحما شريرة .. فماذا تخبئي؟
ج: الحما مش شريرة بس كلامها دبش مش عشان هي شريرة ولكن هي مش بتحط نفسها مكان الناس.
س: ماذا جذبك للمشاركة في مسلسل اللون الازرق؟
ج: استاذ سعد الهنداوي المخرج بشكره انه بيشوفني في حتة مختلفة ودي حاجة بتبسطني، وهو قالي أنتِ محتاجة تطلعي للحتة دي شوية، وعشان كده اشتغلت على نفسي وقريت الورق كويس عشان نوصل للحتة دي.
س: ما رأيك فيما قيل لأحمد رزق عن تكرار أعماله خاصة أن مسلسل اللون الازرق يشبه فيلم التوربيني؟
ج: أحمد رزق مش بيكرر نفسه بالعكس هو في المسلسل طالع أب لابن مصاب بالتوحد مش زي لما طلع هو قبل كده المريض، بالعكس هو طالع بشكل مختلف وهو متميز جدًا في شغله، وحقيقي عامل الدور بمنتهى الجمال.
س: كيف كانت الكواليس في مسلسل اللون الازرق؟
ج: الكواليس كانت جميلة جدًا جوماما مراد وأحمد رزق من الناس المحترفين جدًا يف شغلهم، والشغل مع طاقم العمل كله كان مريح.
س: ما رأيك في مسلسل اللون الأزرق بعد أول يومين من عرضه؟
ج: أنا متفرجتش لسه عليه، ولكن لما شوفت التتر حسيت قد ايه اللي ورا الكاميرا تعبوا في الشغل بعد التصوير وعجبني وخلاني اتفائل انه هيطلع بشكل لطيف.
س: ما الذي تابعتيه في دراما رمضان 2026؟، وما الذي عجبك؟
ج:مش بتفرج على الأعمال، حتى بالأخص مش بحب اشوف أعمالي عشان بشوف عيوب كتير، وممكن أحبط ومعرفش أدخل أعمال جاية بقوة.
س: هل لعبة وقلبت بجد كان من ضمن الأسباب اللي خلتك تتجهي لمناقشة مرض وطرح رسالة جديدة في مسلسل اللون الازرق؟
ج: أه طبعا، أنا بحب لو هشارك في حاجة اسيب اثر، لأن رأيي أن الفن رسالة ودي حلاوة الفن، وعشان كده نجاح لعبة وقلبت بجد شجعني أدخل مسلسل اللون الأزرق.
س: ما الذي جذبك من قبل لمسلسل لعبة وقلبت بجد؟
ج: مسلسل لعبة وقلبت بجد بيخاطب شرائح كتير من المجتمع لأن كلنا عندنا ادمان الموبايل وخطورتها فهو مش بس للاطفال هو للكبار كمان، وكنت متوقعة النجاح ده عشان كده شاركت فيه.
