«اتصورت مع الجثة سيلفي وهي بتطلع لسانها».. جريمة مأساوية تهز الرأي العام

تحدث الكاتب الصحفي وائل موسى مدير تحرير الحوادث بجريدة الجمهورية ومسؤول الملف الأمني، عن واقعة جريمة زوجة تقتل زوجها وتودعه بصورة سيلفي، قائلا: «عمرو كان مضايق ومخنوق وصحبه صديق السوء قاله في اي مالك قاله مخنوق فقاله تعالى أخرجك خروجة حلوة ومن هنا بدأ إنه عرفه على الفنانة عبير اللي انبهرت بثرائه وهيئته، وأول ما شافته نصبتله الفخ عشان تلاغيه وتجيبه على حجرها وتوقعه في شباكها».  

زواج عرفي بشروط

وأضاف خلال حواره مع الإعلامية علا شوشة، عبر قناة «الشمس»: «في الفترة دي عمرو كان متجوز سيدة ملتزمة دينيا وخلقيا اسمها مي أم أولاده، لكن عمرو شكله كان محتاج شوية دلع وعبير دي قالتله يلا نتجوز ووافق بس قبلها خد رأي السواق بتاعه اللي يعتبر كنز أسراره، واقترح عليه يتجوزها عرفي، وقابلها تاني يوم ووافقت تتجوز عرفي بشروط اللي هي مليون جنيه مقدم ومليون مؤخر وعربية جديدة ووافق بس قالها متجيش بعد كده تطلبي نتجوز رسمي».

زواج للمرة الثانية

وتابع: «لما عرف والده وقاله عايز اتجوز واحدة فنانة قاله ازاي مانت متجوز مي وست محترمة، بس لقي ابنه متمسك وقاله خلاص توكل على الله ومرضيش يزعل ابنه، واتجوزها وعزم القريبين بس وخدلها شقة في شارع اللاسلكي بمنطقة البساتين».

تغيير ملحوظ في التصرفات

وواصل: «عبير تصرفاتها بدأت تتغير وكانت ترجع وش الصبح وعمرو بدأ يحذرها، وبدأت البنت الرقيقة الحنينة اللي كانت قبل الجواز تتحول لعنيفة، وعمرو حبها جدا وقدرت تسيطر عليه، عدى شهرين جواز وبدأت أرقام ترن عليه تهدده إنه هيقولو لمراته أنه متجوز عليها وبقى يدفع فلوس مقابل السكوت، وعبير اتغيرت وبقت تهدده وتبتزه وتنادي على جوزها باسم واحدة بنت عشان تهينه، وعمرو مكانش قادر يعنفها عشان بيحبها لدرجة ان الأهالي قالوله انشف شوية».

تهديدات وابتزازات مستمرة

وأكمل: «قال لعبير هطلقك قالتله طلقني وهقول لمراتك، مراته عرفت فعلا إنه اتجوز عليها ومي سابتله البيت ومشيت، عمرو حس إن بيته بدأ ينهار ورجع لنفس الدوامة وتواصل مع والده وقاله طلق عبير وهرجعلك مي».

نهاية مأساوية بالقتل

واختتم: «عبير قتلته وكانت عايزة تبين إن الوفاة طبيعية راحت اتصلت بصحبه وقالت الحقني يا وليد عمور جتله أزمة قلبية، وكانت قبلها عملت تقارير طبية مزورة، وغيرتله هدومه ولبسته فلنة لونها أحمر وجلابية بيضة، وقبل ما يموت قال للشغاله اطلعي صوتي من البلكونة وقولي إن مراتي قتلتني واهربي عشان هتقتلك، وشالته وحطته على السرير واتصورت سيلفي مع الجثة وهي بتطلع لسانها».