صابرين النجيلي: "كنت بمثل شخصية عمري في حياتي ما هكونها في الحقيقة" |حوار
لافتت الفنانة صابرين النجيلي الأنظار حولها في أول تجربة تمثيلية، من خلال مسلسل اتنين غيرنا، الذي لاقى تفاعل كبير من الجمهور خاصة لما تتعرض له من عنف خلال أحداث المسلسل، وأجرى موقع نيوز رووم مع صابرين النجيلي حوار صحفي حتى تكشف عن كواليس التجربة الأولى في التمثيل لها.
وهذا هو نص الحوار:
س: ما الذي حمسك لخوض تجربة التمثيل من خلال مسلسل اتنين غيرنا؟
ج: الدور كويس، وفي تفاصيل حلوة أوي أقدر من خلالها أقيس مدى موهبتي وشطارتي في التمثيل، وتقييمي لنفسي قبل كما حد يقيمني وقولت أجرب فالحمدلله طلع الموضوع كويس.
س: بالنسبة لك ما الأفضل الغناء ولا التمثيل وفي ماذا ستستمري؟
ج: أنا أولًا مطربة وموهوبة في التمثيل بس الغناء هيكون له المحبة الاكبر في قلبي وده ميمنعش أني حبيت التمثيل لما دخلت اتنين غيرنا، إنشاءالله هكمل في الاتنين.
س: حدثينا عن كواليس مسلسل اتنين غيرنا؟
ج: الكواليس كانت كويسة أوي، الطاقم كله جميل وشاطرين ومحترمين وده من حظي في أول تجربة، وكلهم ذوق واللوكيشن مكنش في أي ضغوط فكل حاجة طلعت حلوة.
س: ما هو اصعب شئ في دور وفاء؟
ج: في حاجات كتير في وفاء مش شبهي، منها أنها كانت مسالمة بزيادة وانا مش كده، كنت بمثل شخصية عمري في حياتي ما هكونها في الحقيقة، واللي عجبني فيها أنها فاقت وانتقدت اللي بيحصل وأخدت إجراء علطول، والمشابه بيننا أنها بتسعى وراء حلمها، والمشاهد الدرامية كانت صعبة أوي بس نشكر ربنا طلعت صادقة أمام الجمهور,
س: العنف ضد المرأة بقى أصبح كيف حاله في مصر حاليًا؟
ج: كتير في مصر بالأخص بشكل مستفز وبيزيد أكتر لأسف، وعشان كده كان هدفنا أن أي ست تتعرض للعنف تتحرك وتأخد إجراء، ضد أي عنف مع أي مرأة من أي طبقة.
س: كيف استعدتي لدور وفاء؟
ج: مكنش في أي تجهيز غير أني أفهم دور وفاء وشخصيتها كويس.
س: ما رأيك في ردود الفعل؟
ج: ردود الفعل كانت أحلى مما اتخيل، الحمدلله اني علمت بشكل كويس مع الناس وفي انبهار أن دي الجودة في أول تجربة تمثيل، وتعليقهم أني طبيعية ومستحيل أكون أول مرة تمثيل، فنانين كبار بعتولي أستاذ صبري فواز وأستاذة ريهام عبدالغفور وانبسطت أوي برسالتها ليا، والنجم أحمد حاتم ودينا كانت دايمًا بتشيد بيا والمخرج خالد الحلفاوي من أول قاعدة وهو قالي أنا شايف فيكي ممثلة شاطرة.
س: هل السوشيال ميديا نعمة ولا نقمة بالنسبة لك؟
ج: فيها نعمة كبيرة طبعا ولكن الجزء الأكبر نقمة لأنها بتدي فرصة لمن لا يملكون عقل يقولوا رأيهم في أي حاجة، فبنشوف كل الطبقات وبتسمح للناس بالتدخل في حياة بعض بشكل أكبر.
س: ما النصائح التي فرقت معاكي أثناء تقديم دور وفاء؟
ج: أستاذ خالد الحلفاوي قالي متحاوليش تعملي أي حاجة غير اللي أنتي حساه، وعملت اللي أنا حساه فعلا.
س: ما رسالتك للبنات والسيدات من دور وفاء؟
ج: رسالتي ليهم متقبليش من الأول بحد قليل أو بحد ضعيف ومعندوش رجولة ولا إنسانية، متصرفيش جنيه على راجل مينفعش ست تصرف على راجل، ومتقبليش وتستحملي بحاجة وحشة حتى لو صغيرة، القانون دلوقتي بقى متقدم جدًا وبيجيب فعلا للبنات حقهم بمجرد أنها تصور اللي آذاها.
س: ما رايك في تجربة ال١٥ حلقة؟
ج: حلوة وبتكون لطيفة وخفيفة ولكن أحيانًا الجمهور بيكون متعطش أن المسلسل يكون أطول من كده خاصة لو كان حلو وفرق معاهم، وده اللي حاصل مع جمهور اتنين غيرنا.
س: بما انك خلصتي تصوير حدثينا عن طقوسك في رمضان؟
ج: اليوم بيكون صغير أووي فبنفطر ولو هنعمل الطقوس الرمضانية ونتفرج على حاجة صغيرة كده، نتلم أنا وأسرتي.
س: هل تابعتي مسلسلات في رمضان غير مسلسل اتنين غيرنا؟
ج: لسه بجمع آراء من الناس حول الأعمال الحلوة ومتابعتش حاجة، وأنا متعودة أني اتفرج بعد رمضان، بتفرج على اتنين غيرنا بس.
س: حدثينا عن جديدك بعد رمضان؟
ج: أغنية دلعنا هتنزل في العيد وإيقاعها مقسوم من كلماتي وألحاني كالعادة، ونازية الفترة الجاية أتعاون مع شعراء وملحنين كتجربة، ويارب تعجبكم إنشاءالله.
