مصطفى غريب: "مسلسل هي كيميا مختلف تمامًا عن فيلم الكيف ومينفعش يقارن به" |حوار
حقق الفنان مصطفى غريب نجاحًا لا مثيل له بعد ظهوره في البطولة المطلقة بـ مسلسل هي كيميا، الذي يعد من أبرز الأعمال الكوميدية في النصف الأول من موسم دراما رمضان 2026، وحرص موقع نيوز رووم أن يجري حوارًا صحفيًا مع الفنان مصطفى غريب ليكشف عن كواليس المسلسل بشكل أكبر، وإليكم نص الحوار:
س: مبروك نجاح مسلسل هي كيميا، هل كنت متوقع النجاح ده ولا لأ؟
ج: كلنا بنتمنى النجاح محدش بيتوقعه، وبنبقى حاطين أيدينا على قلوبنا أن المسلسل يعجب الناس، فالحمدلله أن الناس انبسطت.
س: ما الذي حمسك للمشاركة في مسلسل هي كيميا؟
ج: الورق حلو أوي، أستاذ إسلام خيري المخرج، فريق العمل، كل الحاجات دي حمستني أني أكمل المسلسل.
س: هل الأيفيهات كانت مرتجلة أم كلهم مكتوبة في الأسكريبت؟
ج: لا طبعا كان في ارتجال ولكن بالأتفاق مع أستاذ إسلام، كنا بنتناقش معاه وكل حد فينا يقول إيفيه ينفع يتحط وكان أستاذ إسلام بيوافق على اللي ينفع ويشيل اللي مينفعش.
س: خطوة البطولة المُطلقة حسيت إنها بدري ولا متأخرة بالنسبالك ؟
ج: مافيش حاجة بدري أو متأخرة هي كلها ترتيبات من ربنا، وحتى مسلسل هي كيميا أنا حاسس أنه بطولة جماعية كل حد عمل أي حاجة في المسلسل حتى لو بسيطة هو بطل من الأبطال، هو مسلسلنا كلنا.
س: هل كانت لديك تحديات أثناء تصوير مسلسل هي كيميا؟
ج: لا مكنش في تحديات، تحديتات دي كلمة كبيرة أوي على المسلسل، ومكنش في صعوبات ولا تحديات قابلنها، الحمدلله كانت الأجواء لذيذة فحسينا الدنيا سهلة ومافيش حاجة صعبة.
س: حدثنا عن كواليس الغناء مع دياب في مسلسل هي كيميا؟
ج: الغناء مع نجم كبير زي دياب كان ممتع، قولت أجرب أنا بعرف أدي ولكن ليس طرب، وكان معانا الاستاذ أيمن عبدالواحد بيوجهنا عشان نطلع الأغنية بالشكل ده.
س: ما الرسالة التي تريد توجيهها لجمهور هي كيميا من المسلسل؟
ج: رسالتنا نقدر نضحكم ونبسطكم، المسلسل عبارة عن حدوتة مافيهاش حاجة قوية الغرض منها الضحك فقط، في عز الهموم الذي يمر بها الجمهور.
س: هل ماكنش فيه بينك وبين دياب أي مشكلة بسبب ترتيب الاسم على التتر زي ما بنسمع عن نجوم كتير ؟
ج: الحمدلله أي مشاكل من حيث ظهور أو ترتيب أسماء محصلتش في المسلسل مع أي ممثل.
س: المسلسل أحداثه شبه فيلم الكيف، حتى أنت ليك مشهد بتقول فيه لدياب إحنا مش في فيلم الكيف، هل مستوحى منه ولا مالوش علاقة ؟
ج: مافيش مقارنة بـ فيلم الكيف، فيلم الكيف علامة من علامات السينما، لكن ممكن يكون في خط درامي شبيه له، ولكن المعالجة الدرامية مختلفة تمامًا، واللي هيقارن نفسه بفيلم الكسف هيكون خسران طبعًا.
س: إيه رأيك في المسلسلات الكوميدية اللي بتتعرض دلوقتي زي فخر الدلتا وكلهم بيحبوا مودي ؟
ج: متفرجتش على أي حاجة لسه لأننا لسه بنصور، ولكن بتمنى أن ربنا يكرم كل الناس، واللي شغالين في المسلسلين صحابي وزمايلي وأخواتي وربنا يكرمهم جميعًا.
س: مكي وشيكو وأكرم حسني وهشام ماجد من أقرب الناس ليك واشتغلت معاهم، إيه رأيهم في مسلسل هي كيميا ؟
ج: كلهم قريبين ليا وبيتابعوا المسلسل وبيقولولي رأيهم أول بأول والحمدلله المسلسل عاجبهم.
س: بعد البطولة المُطلقة في مسلسل هي كيميا، هل مصطفى غريب مش هيتنازل بعد كده عن البطولة ولا ممكن يبقى بطل تاني مع نجم ؟
ج: الورق اللي هيوديني أنا مش فارقلي أوي بعمل أيه فين على قد ما فارق معايا أقدم ورق حلو بس.
س: ما الجديد لديك الفترة الجاية ؟
فيلم برشامة هيتعرض في عيد الفطر، بطولة النجم هشام ماجد وإخرج المخرج خالد دياب، وإنشاءالله يعجب الجمهور.
